«Дьиэ кэргэн оҕоҕо» бырагыраама үлэлиэҕиттэн түөрт сыл буолла. Кэтээн көрүү түмүгэр, төрөппүт көрүүтэ-истиитэ суох хаалбыт оҕо, төрөппүт быраабыттан итиэннэ саҥа төрөөбүт кырачааннарыттан аккаастанааччылар ахсааннара аҕыйаабыт.
Саха Өрөспүүбүлүкэтин «Дьиэ кэргэн оҕоҕо» бырагырааматын Үлэҕэ уонна социальнай сайдыыга министиэристибэ хайдах толорорун туһунан социальнай хааччыйыыны тэрийии департаменын салайааччы Анастасия Аккуратова маннык кэпсээтэ:
– Бырагырааманы 2012-2015 сс. олоххо киллэрии түмүгүнэн, өрөспүүбүлүкэ дьиэ кэргэттэрин уонна оҕолорун социальнай өттүнэн хааччыйар 31 тэрилтэ саҥа өҥөнү туһанар кыахтанна. Ол эбэтэр, олох ыарахаттарыгар түбэспит оҕолор уонна оҕолордоох ыал доруобуйаларын чөлүгэр түһэрэргэ, оонньууну уонна сынньалаҥы тэрийэргэ үлэлэһиэн сөп. Олох ыарахаттарыгар түбэспит 7 584 дьиэ кэргэҥҥэ уонна 42 276 оҕоҕо сэрэтии үлэлэрэ ыытылыннылар. Оҕону дьиэ кэргэттэригэр ылыахтарын баҕарар ыалларга быһаарар, бэлэмниир үлэлэр ыытыллаллар, «Оҕону дьиэҕэ ылар төрөппүттэр оскуолалара» үлэлиир.
ЫСПЫРААПКА:
Төрөппүт көрүүтэ-истиитэ суох хаалбыт оҕолортон уонна тулаайах оҕолортон 238 кырачаан эпэкиин уонна бэйэлэригэр иитэ ылар ыалларга бэрилиннэ. Социальнай кутталлаах балаһыанньалаах ыалы эрдэттэн билэр туһугар 19 социальнай көмө көһө сылдьар сулууспата тэрилиннэ. Сулууспа өҥөтүнэн олох ыарахаттарыгар түбэспит 5 330 ыал, ол иһигэр 11 785 оҕо, ону сэргэ социальнай өттүнэн кутталлаах балаһыанньалаах 3 830 дьиэ кэргэн, ол иһигэр 8 333 оҕо хааччылынна. Ыксаллаах балаһыанньаҕа түбэспит 4 дьахтар социальнай кыбартыыраҕа олорор. Социальнай кыбартыылар өҥөлөрүнэн барыта 46 ыал туһанна.
This post was published on 25.06.2016 18:16 18:16