Үөдэйгэ ахсынньы 27 күнүгэр Е.И. Кондакова аатынан олохтоох балыыһаҕа аптека пууна арылынна. Тэрилтэ Намнааҕы киин балыыһа иһинэн, кылаабынай быраас Ариан Сергеев өйөбүлүнэн, үлэтин саҕалаата, суруйда «Эҥсиэли» хаһыат.
Кыһыл лиэнтэни олохтоох дьаһалта баһылыга Иван Гаврильев, киин балыыһа кылаабынай бырааһа Ариан Сергеев уонна улуустааҕы аптека провизора Людмила Жиркова үөрүүлээх быһыыга-майгыга кырыйдылар. Аптекаҕа ис-үөс, тымныйыы, сүрэх, тымыр онтон да атын бастакы суһал көмө эмэ-томо барыта баар. Анал хоско холодильникка, сөптөөх ыскаапка хараллан тураллар.
Бастакы атыылаһааччы Мария Поповаҕа нэһилиэк баһылыга Иван Гаврильев сэмэй бэлэҕи уонна Ариан Николаевичка махтал суругу туттарда.
Атыылааччынан олохтоох эмтиир амбулатория үлэһитэ Галина Скрябина үлэлиир.
Екатерина Эверстова, Үөдэй
