Соторутааҕыта Наталья Кривошапкина — Далаана «Ырыам кута» диэн тыыннаах музыка доҕуһуолунан кэнсиэр бэлэхтээтэ. Хас да саҥа ырыатын сүрэхтээтэ.
«Хас да сыллааҕыта доҕорум Айгылаан ырыа айарбар көрдөспүтэ. Ол саҕана кини үҥкүүлүүр эрэ этэ. Кини бастакы «Доҕотторум, атастарым» ырыатын мин суруйбутум. Сотору кэминэн «Саҥа ырыа» куонкуруска кыттыбыта. Онуоха эмиэ ырыа суруйарбар көрдөспүтэ. Онно «Уоллаах кыыс» диэн ырыа айыллыбыта. Продюсер Семен Ченянов истэн баран, бу нарын ырыа Айгылааҥҥа барсыа суоҕа диэн эппитэ. Онтон Айгылааҥҥа «Сардаана» диэн ырыаны айбытым. Кини «Сардаананан» куонкуруска ситиһиилээхтик кыттыбыта«, — диэн кэпсиир Далаана.
Кэнсиэркэ Далаана ийэтэ,СӨ үтүөлээх бырааһа Аграфена Яковлева, балта Саргылаана, быраата Иван уонна кэргэнэ Иннокентий сылдьыбыттар. Иннокентийга Далаана «Тапталлааҕым» диэн саҥа ырыатын бэлэхтээтэ. Бу ырыатын кини 20 мүнүүтэ иһигэр айбыт.
«Биирдэ биэс мүнүүтэ иһигэр ырыа айан турардаахпын, ол рекорд этэ. Сороҕор биир ырыаҕа хас да күн барар. Киһи санаатыттан, туругуттан, иэйиититтэн тутулуктаах. Миэхэ иэйиини, биллэн турар, кэргэним биэрэр«, — диэтэ.
«Ырыам кута» бырайыак Эстрада тыйаатырын тэрээһинэ. Бу иннинэ бырайыакка Уля Сергучева — Күннэй, Ольга Егорова — Ника, Павел Семенов, Иннокетий Васильев — Лэгэнтэй, Василий Сорокин — Айгылаан, Варя Аманатова уо.д.а. кыттыбыттара.
Николай ПОПОВ, «Саха сирэ» хаһыат, edersaas.ru
