Дьааҥы оройуонугар балаҕан ыйын 1 күнүгэр диэри халаан уутуттан эмсэҕэлээбит оскуолаларга уонна уһуйааннарга чөлүгэр түһэрэр үлэлэр түмүктэниэхтээхтэр. Кинилэр өрөмүөннэригэр өрөспүүбүлүкэ пуондатыттан 27 мөл. солк. кэриҥэ үп көрүллүбүт.
Улууска халаан уутун содулугар барыта 15 оскуола, оҕо саада, ону тэҥэ, Суордаахха, Дулҕалаахха уонна Бөтөнкөскө үс балыыһа эмсэҕэлээбитэ, өрөмүөҥҥэ үп тыырылынна.
Үөрэх уонна доруобуйа харыстабылын эбийиэктэрин таһынан Дулҕалаах, Боронук, Адыаччы уонна Сартан нэһилиэктэригэр икки администрация уонна култуура дьиэлэрин, Верхоянскай куоратыгар уонна Боронук нэһилиэгэр спортивнай саалалары, Суордаахха оскуола саалатын, уонна Бөтөҥкөскө эмиэ многофункциональнай спортивнай сааланы өрөмүөннүү сылдьаллар. Үлэ түмүктэнэр болдьоҕо алтынньы 30 күнүгэр диэн быһаарылынна.
Тутуу матырыйаалларын улууска кэлэ сылдьыбыт Арассыыйа ЫБМ МИ-26 бөртөлүөтүнэн Айсен Николаев сайаапкатынан тиэрдибитэ. Өссө икки рейси толороро хаалла.
Чөлүгэр түһэрии үлэлэрэ барыта тымныы саҕаланыар диэри ситэриллиэхтээхтэр.
