Дьааҥы улууһугар 62 саастаах эр киһи сүттэ. Бу киһи туһунан сурах иккис нэдиэлэтин суох. Алтынньы 10 күнүгэр көрдөөһүҥҥэ оройуоннааҕы көрдүүр-быыһыыр этэрээт сэттэ быыһааччыта Ми-8 бөртөлүөтүнэн үлэҕэ тардылыннылар, диэн СИА өрөспүүбүлүкэтээҕи быыһыыр сулууспаҕа сигэнэн иһитиннэрэр.
«Эр киһи Дулҕалаах өрүһүн таһыгар сүппүт, бүтэһигин сибээскэ балаҕан ыйын бүтүүтэ тахсыбыт. Кэлин бэйэтин туһунан биллэрбэтэх, ол иһин алтынньы ый саҥатыттан аймахтара олохтоох дьон көмөтүнэн бэйэлэрэ көрдөөн саҕалаабыттар. Алтынньы 10 күнүгэр көрдөөһүҥҥэ быыһааччылар кыттыстылар», — диэн Саха сирин быыһыыр сулууспатын начальнигын бастакы солбуйааччы Василий Тарскай иһитиннэрдэ.
Бөртөлүөтүнэн көрдөөһүн бастакы күнэ туох да түмүгү аҕалбата, көрдүүр үлэ салҕанар.
