Дьааҥы Дулҕалааҕар саҥа тоҥон эрэр муустаах ууга түспүт сылгыны оруурга улуус быыһыыр этэрээтин үлэһиттэрэ көмөлөстүлэр, диэн «Вести Верхоянья» телеграм-ханаал иһитиннэрэр.
Быһылаан алтынньы 12 күнүгэр буолбут. Чараас муус сылгы ыйааһынын кыайбакка, төбөтүгэр тиийэ муустаах ууга түспүт. Дэлби тоҥмут, ууттан тахса сатаан сэниэтэ эстибит сылгыны олохтоох эр киһи бэлиэтии көрбүт, уонна быыһааччылары ыҥырбыт.
Сылгыны быыһыыр үлэни Дьааҥы көрдүүр-быыһыыр этэрээтин начальнига Руслан Потапов салайан ыытта. Үлэ хас эмэ чааһы быһа барда, бастаан быыһааччылар күрдьэҕинэн мууһу ыраастаатылар онтон сылгыны быанан баайан тахсарыгар көмөлөстүлэр.
This post was published on 13.10.2022 09:03 09:03