Дьааҥы оройуонун киинигэр Баатаҕай бөһүөлэгин чугаһыгар бэс ыйын 29 күнүгэр этиҥ чаҕылҕаныттан нефтебаза ойуурун таһыгар икки уот түһэн, улахан баһаар тура сырытта. Ыксаллаах балаһыанньа туоратыыга олохтоох дьон-сэргэ барыта турунна. Өрөспүүбүлүкэ салалтатыттан күүстээх көмө оҥоһулунна.
Баатаҕайдааҕы ойуур баһаарын бохсууга туох хайдах үлэ барбытын туһунан улуус баһылыга Гаврил Чириковы кытта кэпсэттибит.
— Гаврил Ильич, уот туруоҕуттан балаһыанньаны барытын тутан олорор салайааччы быһыытынан тугу бэлиэтиигин?
— Уот түргэнник тарҕанан, ордук 30 чыыһылаҕа улахан кутталы үөскэтэ сырытта. Нэһилиэнньэ, тэрилтэлэр салайааччылара сөпкө өйдөөннөр, дьону таһаарсан, мобилизацияҕа бары кытыннылар. ЛЗК өттүгэр суоһаабыт уокка суһаллык тэрилтэлэр техникаларын туруордубут. «Дороги Арктики» салайааччы Потапов Геннадий Васильевич, ОДьКх ГУТ — Смолин Василий Васильевич, “Сахаэнерго” Беканов Эдуард Реваевич, “Арктика” ХЭУо Мартиросян Карен Андрушович, Баатаҕайдааҕы Авиапорт Першикова Виктория Геннадиевна техникаларын уонна хамаандаларын (дьонун) таһааран улахан алдьархай тахсыбата дии сыаналыыбын.
— Былырыын эмиэ ойуур баһаардарыттан улууска улахан хоромньу тахсыбыта. Ил Дархан Дьааҥыга кэлэ сылдьан, тута дьаһаллары ылан, СӨ Бырабыыталыстыбата көмөлөһөн оройуон кыстыгы этэҥҥэ туораата. Быйылгы балаһыанньа хайдаҕый?
— Уот туруутунан ыксаллаах майгы үөскээн, Дьокуускайга биллэрээппитин кытта, СӨ нэһилиэнньэ олоҕо-дьаһаҕа куттала суох буолуутун судаарыстыбаннай Кэмитиэтин бэрэсэдээтэлэ Лепчиков Дмитрий Николаевич уонна бастакы солбуйааччыта Андросов Иннокентий Михайлович Баатаҕай бөһүөлэгин уоттан көмүскүүргэ суһал дьаһаллары ылбыттара, Авиапорт баһаарынай массыынатын уонна хамаандатын туруоран, Верхоянскай куораттааҕы Баһаарынай ДЕПО массыынатын ыытан, улахан көмөһү оҥорбуттара. От ыйын 2 күнүгэр Ил Дархан Айсен Сергеевич СӨ Суһал быһыы-майгы ыйааҕын таһаарбыта. Ил Дархан дьаһалынан от ыйын 3 күнүгэр «Якутлесресурс” тэрилтэнэн 17 баһаары умуруорар байыас Дьааҥыга кэлэн, авиапорт оройуонугар суоһаабыт уоту бохсооһуҥҥа, салгыы уоту тохтотууга үлэ барар. Маны таһынан СӨ Ыксаллаах быһыы-майгы Кэмитиэтин дьаһалынан, араас филиаллартан 9 киһи Нефтебаза таһыгар турбут уоту тохтотто. Уот тобохторун «Саханефтегазсбыт” Баатаҕайдааҕы филиалын директора Колосов Артем Степанович техническэй өттүнэн сөптөөхтүк көрөн, сменанан туруоран, Саханефтегаз киин дирекциятыттан кэлбит исписэлиистэри кытта умуруоруу үлэтэ ыытылла сылдьар.
— «Дьааҥы оройуона» муниципальнай тэриллии дьаһалтатын салайааччылара бу буола турар балаһыанньаҕа уоту умуруорууга уонна ыытыллар дьаһаллар тэрээһиннэригэр тэҥҥэ сылдьаллар.
— Холобур улуус дьаһалтатын баһылыгын солбуйааччы Олег Михайлович Репкин баһаар тахсыаҕыттан күннэри-түүннэри былааннааһыны, техника уонна дьон күүһүн аттаран туруорууну сүрүннээтэ. Дьаһалта үлэһиттэрэ суһал дьаһал ыланнар, дьону, техниканы туруораннар, дьону кытта тэҥҥэ үлэлээннэр, улахан алдьархай тахсыбата дии сыаналыыбын.
— Маннык түгэннэргэ сири-дойдуну, картатын билэр туһааннаах тэрилтэлэр сүбэлэрэ, ыйыылара-кэрдиилэрэ сөптөөх быһаарыныыны ыларга көмөлөрө улахан буолуо.
— Методическай, практическай көмөнү оҥорууга, уоту умуруорууга ГКУ Верхоянскайдааҕы ойуур хаһаайыстыбатын салайааччыта Шестаков Константин Егорович тус бэйэтинэн сылдьан уонна дьону үлэлэппитэ махталлаах. Уот хаамыытын чинчийиигэ Айылҕа харыстабылын иниспиэксийэтэ Николай Геннадиевич Степанов «Нефтебаза” баһаара ойууру төгүрүктээн киирбитин быыһыырга сөптөөх былааны, чинчийиини оҥорон уонна Баатаҕайы уоттан көмүскээһиҥҥэ олохтоох дьаһалта баһылыга Шестаков Егор Егоровиһы кытта бииргэ үлэлээн, уот барыыта тохтотуллан, улахан алдьархай тахсыбата диэн бэлиэтиэхпин баҕарабын.
— Куйаас күннэр кэннилэриттэн аны тыаллаах тымныы күннэр турдулар. Билиҥҥи туругунан ханнык учаастактарга салгыы умуруоруу үлэтэ, кэтэбил барарый?
— Уһун курааннар турууларыттан, улахан этиҥ чаҕылханнара хойуу талахтаах, мастаах сиргэ тэбис-тэҥҥэ түһэн, эбиитин мүнүүтэҕэ 16 миэтирэ күүстээх тыал кэлэн улахан баһаардар буола сыстылар. Бүгүҥҥү туругунан уот дьон, техника күүһүнэн намтатылынна. Бу күннэргэ бүтэһиктээхтик умулуннарарга солбуйсар сменалары тэрийэн салгыы үлэ ыытыллыаҕа. Уот сүрүн төбөтө алта сиринэн — ЛЗК, Нахаловка, Нефтебаза, Чолбон, Круглое озеро уонна Веселый ручей баар. Уот киэһэ умуруоруллан баран түүн күөдьүйэн тахсыан сөп, онон дьон, техника , туттуллар тэриллэр наадалар.
— Ааспыт сыл баһаардарыттан тахсыбыт уоту умуруорууга, тахсыбыт хоромньуга СӨ Бырабыыталыстыбата улахан болҕомтотун уурбута. Быйылгы ыксаллаах балаһыанньа биллэриллэн тутатына үөһэттэн көмө кэлиититтэн нэһилиэнньэ санаата өрө көтөҕүлүннэ.
— Ил Дархан уонна СӨ Бырабыыталыстыбатын солбуйааччы Алексей Засимович Колодезников, СӨ нэһилиэнньэ олоҕо-дьаһаҕа куттала суох буолуутун судаарыстыбаннай Кэмитиэтин бэрэсэдээтэлэ Лепчиков Дмитрий Николаевич уонна бастакы солбуйааччыта Андросов Иннокентий Михайлович дьаһалларынан уот умуруорар тэриллэр, насоснай ыстаансыйалар, баахтар, рукавтар, ас кэллиллэр, маны таһынан ГСМ-ы эбии биэрэргэ дьаһал таһаардылар.
Тус бэйэм уонна Дьааҥы улууһун олохтоохторун аттарытттан Өрөспүүбүлүкэбит Ил Дарханыгар Айсен Сергеевичка, Бырабыыталыстыба Бэрэсэдээтэлин солбуйан олорор Алексей Засимович Колодезниковка, СӨ нэһилиэнньэ олоҕо-дьаһаҕа куттала суох буолуутун Государственнай Кэмитиэтин бэрэсэдээтэлэ Лепчиков Дмитрий Николаевичка, СӨ нэһилиэнньэ олоҕо-дьаһаҕа куттала суох буолуутун Государственнай Кэмитиэтин бэрэсэдээтэлин солбуйааччытыгар Андросов Иннокентий Михайловичка, «Якутлесресурс» генеральнай директорыгар Хон Дьулустаан Ивановичка, Экология уонна Айылҕа харыстабылын Министерствотыгар Сахамин Миланович Афанасьевка, солбуйааччытыгар Алексей Николаевич Агеевка Дьааҥы оройуонун олохтоохторун, муниципальнай тэриллиилэр баһылыктарын ааттарыттан махталбытын тириэрдэбит.
