Олохтоохтор өр күүппүт үөрэхтэрин тэрилтэтэ арыллыбытынан Ил Дархан Айсен Николаев бэйэтинэн тиийэн эҕэрдэлээтэ. Тутуу 2022 сыллаахха саҕаламмыта.
«2022 сыллаахха Дьааҥыга үлэбинэн командировкам кэмигэр быһаарыы ылбытым — түргэнник оскуола тутарга. Икки сылтан ордук кэм ааста, оскуола аанын арыйда. Бу оскуола иһиттэн төрөөбүт дойдуларын патриоттара үөрэхтэрин бүтэрэн тахсан, салгыы Дьааҥыларын улууһугар, Саха сирин бүттүүнүгэр туһалаах дьон буоллуннар», – диэтэ өрөспүүбүлүкэ баһылыга.
Айсен Николаев оскуолаҕа пилота суох көтөр аппараат ыларга сертификат туттарда.
Саҥа эбийиэк 80 оскуола уонна 40 дьыссаат миэстэлээх, иэнэ 3200 кв. м. Усулуобуйа тэриллибит. Сырдык кылаастар, оонньуур сирдэр, спорт уонна технология кабинеттара. Аныгы оборудованиенан хааччыллыбыттар.
«Бу күнү наһаа күүттүбүт. Билигин биһиги оҕолорбут сырдык, киэҥ кылаастарга үөрэниэхтэрэ, аныгы спортсаалаҕа дьарыктаныахтара, саҥа оборудованиеларынан туттуохтара. Сайдыыбытыгар историяҕа хаалар күн буолла», – диэтэ оскуола дириэктэрэ Александр Дьяконов.
Билигин оскуолаҕа 53 үөрэнээччи уонна 15 дьыссаат иитиллээччитэ баар. Оҕолор саҥа оскуолаларын кытта билистилэр.
«Саҥа оскуолабытыгар наһаа кэрэ! Мин спортивнай сааланы уонна бибилэтиэкэни ордук сөбүлээтим. Билигин үөрэнэргэ ордук интэриэһинэй буолуоҕа», – диэтэ алтыс кылаас үөрэнээччитэ Афанасий Томский.
Оскуола Саха сирин инвестиционнай бырагырааматын чэрчитинэн тутуллар, Россия президенэ Владимир Путин көҕүлээбит «Үөрэҕирии» национальнай бырайыак сыалларын тутуһар.
This post was published on 25.02.2025 15:01 15:01