Дьааҥы улууһугар «Тымныы Полюһа» ТХПК базатыгар аныгы хотон, модульнай үүт собуота үөрүүлээхтик арылынна. Бу дьаһал оройуон агропромышленнай комплексын сайдыытыгар уонна ас-үөл куттала суох буолуутугар улахан хардыыны оҥордо. Бу туһунан Саха Сирин Арктиканы сайыннарыыга уонна Хотугу норуоттар дьыалаларыгар министиэристибэтин пресс-сулууспата иһитиннэрэр.
Министиэристибэ тыа хаһаайыстыбатын саҥа эбийиэктэрэ арыллыбыттарынан эҕэрдэлээтэ, «Полюс Холода» ТХПК дириэктэрэ, региоҥҥа норуот хаһаайыстыбатын үтүөлээх үлэһитэ, СӨ Судаарыстыбаннай Мунньаҕын (Ил Түмэн) III ыҥырыылаах депутата Екатерина Портнягина уһулуччу оруолларын бэлиэтээтэ.
Екатерина Портнягина үлэ киһитин, төрөөбүт сир патриотун уонна хотугу сахалар үгэстэрин харыстааччытын үтүө холобурунан буолар. Кини өр сыллаах уонна көдьүүстээх салалтатынан «Тымныы Полюһа» ТХПК Дьааҥы оройуонун социальнай-экономическай сайдыытыгар улахан кылаатын киллэрэр. Кооператив үлэтин көмөтүнэн Арктика оройуонугар тыа хаһаайыстыбатын оҥорон таһаарыыта көхтөөхтүк сайдар, ону тэҥэ саха норуотун култуурата уонна үгэс буолбут хаһаайыстыбаннай үлэтэ өрө тутуллар – сүөһү уонна сылгы иитиитэ. «Полюс Холода» ТХПК бородууксуйата хас сыл ахсын бүтүн Россиятааҕы быыстапкаларга кыһыл көмүс мэтээлинэн бэлиэтэнэр.
«Екатерина Портнягина салайааччылаах «Тымныы Полюһа» кээпэрэтиип үүтү уонна үүт аһы оҥорон таһаарыы эйгэтигэр үлэтэ ураты билиниигэ сылдьар. Саҥа эбийиэктэри арыйыы Ил Дархан Саха сирин Арктикатын зонатын сайыннарыы туһунан стратегическай ыйааҕар туруоруллубут сорук буолар», — диэн миниистир Владимир Черноградскай бэлиэтээтэ.
This post was published on 09.10.2025 12:48 12:48