Харалдьыкка ньургуһун быгыыта, Дьааҥы куоратыттан «Алгыс» пиэрмэ сүөһүтэ саас ахсын айанныыр суолларынан 3 көстөн тахса тэйиччи ыраах Ыыстаах сайылыгар туруммута. Сааскы аар тайҕа иһинэн 160 хороҕор муостаах утуу-субуу сарсыардааҥҥа диэри субуста.
«Сүрүн өттө 12 чаас саҕана барбыта — сиир отторун комбикормаларын илдьибиппит. Аара хаалбыт ынахтар сарсыҥҥы күнүгэр тиийдилэр. Уопсайа 16 киһи үүрэн арыаллаата. Халлаан сылыйдаҕына эбии 70-тан тахса торбос уонна төрөөрү турар ынахтары массыынанан илдьиэхпит. Сайыҥҥы бириэмэбитигэр Остоолботтон 7 киһи тиийэн улэлиэхтээх, маннааҕы үлэһиттэрбит хаалбыт сүөһүлэри көрөллөр», — диир «Тымныы оройо» ТХПК дириэктэрэ Екатерина Портнягина.
Остоолбо бөhүөлэгин олохтоохторо оҕотуттан оҕонньоругар тиийэ, Ыыстаахха айаннаан эрэр маҥыраспыт, оруласпыт халыҥ хаhаайыстыбаны — сүүhүнэн ынах сүөhү айанын көрөн «үчүгэй түстээх көстүү буолла» дэстилэр.
Ыыстаах сайылыга — таҥара дьиэтин тэҥэ. Онон бу быйаҥнаах үтүө сиртэн элбэх үүтү, өлгөм оту, сүөһүлэр кылгас сайын устата төлөһүйэн тахсалларын туһугар аал уот оттон, арыылаах саламаатынан айах тутан сири-дойдуну күндүүлээтилэр. «Ыыстаахха саҥа сайылык тутар киһи төһө эрэ үчүгэй буолар этэ», — дэһэллэр пиэрмэ үлэһиттэрэ.
«Дьааҥы куоратын «Тымныы оройо» тэрилтэ оройуон үгүс нэһилиэгин төгүрүк сыл устата үрүҥ аһынан хааччыйар. «Саха сирин Ил Дархана Айсен Николаев Дьааҥы оройуонугар кэлэ сылдьыытыгар, бу тэрилтэ «Алгыс» пиэрмэтигэр саҥа хотон тутуутун туһунан туруорсууну өйөөбүтэ. Онон хотон тутуллуох курдук буолан эрэриттэн үөрүүбүт улахан. Быйыл тыа хаһаайыстыбатын министиэристибэтэ, миниистир Александр Атласов 120 туонна оту тиэйиигэ субсидия биэрбитэ уонна улууспут баьылыга Гаврил Чириков кыстыгы туоруурга улаханнык көмөлөстө», — диэн сайылыкка көһүү үлэтиттэн быыс булан махтана кэпсиир Екатерина Портнягина.
Хоту дойду томороон тымныытын этэҥҥэ кыстаан тахсыбыт, кыһыны быһа хотоҥҥо турбут ынахтар сайылыкка тиийэн дуоһуйа хаамыстылар, аны сотору торбостор тиийэн тойбороҥноһуохтара. Уонна быйыл оҕус торбос хайа да сыллааҕар элбээбитэ — быйаҥҥа буоллаҕа.
This post was published on 24.05.2021 11:07 11:07