Өрөспүүбүлүкэ бэтэринээрийэтин департамена иһитиннэрэринэн, бэтэринээр-биэлсэр В.А.Цуканова салайааччылаах биригээдэ бэҕэһээ, от ыйын 26 күнүгэр, Дьааҥы улууһун Эгэ нэһилиэгин Оһохтоох диэн учаастагыттан киирбит тыллабырынан тахсан, көтөрдөр өлүктэрэ көстүбүт Байбал Күөлүн чинчийэн көрдө.
Биригээдэ Байбал Күөлүгэр көтөрдөр уйаланар сирдэрин аттыгар 20 миэтэрэлээх эргимтэ иһиттэн 30 тыыраахы оҕотун өлүгүн булбут. Бэтэринээрийэ исписэлиистэрэ ити сиргэ улахан тыыраахылар уонна атын уу көтөрдөрүн өлүктэрин булбатахтарын бигэргэттилэр. Дьокуускайга өрөспүүбүлүкэтээҕи бэтэринээрийэ чинчийэр лабораториятыгар ыытаары, өлбүт көтөрдөртөн уонна күөл уутуттан, буоруттан боруоба ылбыттар. Ол гынан баран, Дьааҥы улууһунааҕы бэтэринээрийэ управлениетыттан иһитиннэрэллэринэн, күн-дьыл туругунан көтөр аал сырыытыгар хаайтарыы буолан, Баатаҕай бөһүөлэгэр тиксэрэллэрэ харгыстанан турар.
Василий НИКИФОРОВ, edersaas.ru
This post was published on 27.07.2018 12:08 12:08