24 Тохсунньу 24.01
  • -48°
  • $ 73,82
  • 83,32

Үөдүгэйгэ гаастааһын үлэтэ тэтимнээхтик ыытыллар

17:38, 01 сентября 2016

Үстэн элбэх оҕолоох ыалга босхо уһаайба биэрии чэрчитинэн элбэх оҕолоох дьиэ кэргэн олорор сирдэринэн сайабылыанньа суруйан уочаракка тиксэр. Хайа да сиргэ, куоракка да, улууска да буоллун, учаастагы биэрии боппуруоһа сытыытык турар.


Үөдүгэй нэһилиэгэр 2013 сылтан элбэх оҕолоохтортон 225 сайабылыанньа киирэ сытар. Хоту алааска «Молодежнай учаастак» диэн ааттанан, 2013 сыллаахха аукцион ыытыллан, 50 учаастак бэриллибитэ. Кэнники сылларга ойуур иһигэр эбии 70 уһаайба эбиллэн оҥоһуллар. Нэһилиэк баһылыга Михаил Донской кэпсиир: «Правительство, Ил Дархан Егор Борисов өйөбүлүнэн, газ киллэриитигэр, бырайыактааһын үлэтигэр 34 мөл. суума бэриллибитэ. 131 уһаайбаҕа газ киллэриитэ былааннанар, быйыл «Вилюйгазстрой» тэрилтэ (прораб Курбон Аминов) үлэтин бүтэриэхтээх. Кинилэр үлэлэрин улуустааҕы газ тэрилтэтэ хонтуруоллуур. Маны сэргэ, Полевой уонна Аласнай уулуссаларга 17 уһаайбаҕа стояк турда. Бу таһынан, элбэх кэпсэтии, сүүрүү-көтүү түмүгэр тыа хаһаайыстыбатын министиэристибэтэ 3 уулусса гаастааһыныгар 8 мөл. суума көрдө. М.Николаев, Е.Михайлов, В.Налыйдыров ааттарынан уулуссаларга барыта 34 стояк турда. Аукциону «Стройинженеринг» тэрилтэ кыайан, үлэлээн бүтэрдэ эрээри, үлэлэрин кыайан туттарбакка сылдьаллар. Уулуссаларга сытар маардары кыайан көмпөккө, сир тоҥорун кэтэһэллэр. Халлаан тымныйыан иннинэ, М.Николаев аатынан уулуссаҕа гааһы киллэриҥ диэн көрдөһө сылдьабыт».

Ойуур иһигэр эбиллибит 70 учаастакка стояк турар эрээри, аны уота суох диэн Михаил Гаврильевич кэпсээтэ: «Гааһа, уота, суола суох буоллаҕына, сокуонунан уһаайба бэриллибэт. Бу уһаайбаларга уот киллэриитин туһунан элбэх кэпсэтии, үлэ барда. Тутуу министиэристибэтэ 7 мөл. 666 тыһ. солк. харчыны көрдө, быйыл 2 мөл. сууманы биэрдэ, кэлин онно эбии 1 мөл. бэрилиннэ. Онон, уокка 3 мөл. суума баар буолла. Кэлэр 2017 сылга сорох харчытын кэтэһэбит. Баар харчынан 40 уһаайбаҕа «Западные электросети» (ген.дир. Игорь Забегин) тэрилтэ эһиил уоту киллэриэҕэ. Быйыл бырайыак оҥоһуллар. Газ, уот киллэриитэ олус эрэйдээх, элбэх үлэни, кэпсэтиини, туруорсууну эрэйэр. Үксүгэр Ил Дархан Егор Борисов, бырабыыталыстыба бэрэссэдээтэлэ Галина Данчикова өйөбүллэринэн оҥоһуллар», — диэн нэһилиэк баһылыга кэпсэтиини түмүктүүр.

0
0
24 января 24.01
  • -48°
  • $ 73,82
  • 83,32