СӨ Айылҕа харыстабылын министиэристибэтэ сыл ахсын «Чыычаахтары аһат» акцияны ураты сэргэхтик тэрийэр. Маныаха тулалыыр эйгэни, көтөрү-сүүрэри харыстааһыҥҥа өрөспүүбүлүкэ бары оскуолалара, оҕо саадтара көхтөөхтүк кытталлар.
Быйылгы тэрээһин буоларын курдук, олунньу саҥатыттан кулун тутар ый бүтүөр диэри салҕанар. Акция түмүгэ муус устарга – Чыычаахтар Күннэригэр биллэриллиэхтээх. Тэрээһин хайдах баран иһэрин туһунан СИА тустаах министиэристибэ пресс-сэкирэтээрэ Анна Налимова иһитиннэрдэ.
«Акцияҕа кыттааччы ахсаана сыллата элбиир. Быйыл оҕо саадтырагыр кырачааннарга оонньуулар, таабырыннары таайыылар, хоһооннору-ырыалары үөрэтиилэр көхтөөхтүк бардылар. Хаһан баҕарар буоларын курдук, Муома улууһун Улахан Чыыстай нэһилиэгинээҕи «Ньургуһун» оҕо саада бу тэрээһиҥҥэ ураты көхтөөхтүк кытынна. Оскуолаларга үлэ эмиэ сэргэхтик салҕанар. Холобур, Бүлүү улууһугар тэрээһини олохтоох араадьыйанан тиһиктээхтик биллэрэ, үлэни-хамнаһы сырдата тураллар. Маныаха улуустааҕы айылҕа харыстабылын инспекцията үөрэх тэрилтэлэригэр иһитиннэриилэри, суругунан сырдатыылары, өйдөтөр-санатар үлэлэри кэмиттэн-кэмигэр тэрийэрэ төрөөбүт айылҕаны харыстааһыҥҥа улахан оруолу ылар. Учууталлар, оҕо саадын иитээччилэрэ бэртээхэй куонкурустары, викториналары, интэриэһинэй көрсүһүүлэри, кылаас чаастарын ыыталлар. Оҕолор чыычаах уйаларын оҥортоон саадтарын, оскуолаларын, дьиэлэрин таһыгар ыйыыллара көрүөххэ олус үчүгэй», — диэн кэпсиир.
Анна Валерьевна ленскэйдэр тэрээһиннэрин киэн туттан бэлиэтиир. Айылҕа харыстабылын оройуоннааҕы комитетын инспектордара А.Фёдоров, С.Васильев үөрэнээччилэрдиин көрсүһүүнү викториналаах, презентациялаах тэрийбиттэрэ улахан болҕомтону тардыбыт. Оҕолор ураты харыстанар сир-уот туһунан инспектордарга элбэх ыйытыылары биэрбиттэр. Чыычаахтарга анаан оҥорбут уйаларын хаһан, ханна ыйыылларын сүбэлэспиттэр. Онтон Горнайга үлэ уруогар уонна кылаас чаастарыгар оҕолор учууталларын кытта көмөлөөн чыычаах уйаларын оҥоро сылдьалларын туһунан үөрүүлээх иһитиннэрии кэлбит.
Маны сэргэ, кинилэргэ кыстыыр көтөрдөрү харыстааһыҥҥа бэсиэдэлэр ыытыллыбыттар. Тааттаҕа А.Е.Мординов аатын сүгэр улуустааҕы лицей көҕүлээһининэн, идэни талыы дьаарбаҥкатыгар, айылҕа харыстабылын инспектордара «Эколог – кэлэр кэм идэтэ» диэн лекция аахпыттар. Ол кэнниттэн үөрэнээччилэр эколог үлэтин, ханна үөрэнэн бу идэни ылыахха сөбүн, үөрэҕи бүтэрдэххэ үлэ миэстэтинэн хааччылыы хайдаҕын токкоолоспуттар.
Пресс-сэкирэтээр бэлиэтииринэн, кэнчээри ыччат тулалыыр эйгэни, көтөрү-сүүрэри харыстааһыҥҥа болҕомтотун уурара, бу хайысханы сэҥээрэрэ улаатан иһэр.
