Былырыын Чыбааҕылаах нэһилиэгэр Мэҥэ Хаҥалас улууһуттан саха боруода сүөһүлэрин аҕалтарбыттара. Үлэни Албан Старков хаһаайыстыба тэринэн сүрүннүүр.
Сүөһүлэр кыстыгы хайдах туораабыттарын туһунан тыа хаһаайыстыбатын исписэлииһэ Роман Павлов «Индигир уоттара» хаһыакка кэпсээтэ:
— Сүөһүлэр этэҥҥэ кыстаан эрэллэр. Икки бургунас, биир атыыр оҕус, түөрт тыһаҕас баар. Сүөһүлэри Василий Готовцев кыһамньылаахтык көрөр-истэр. Олус бор эбиттэр. Отторугар улаханнык талымастаабаттар. Тымныыны да тулуйаллар. Кыһын -50 кыраадыска ойбоҥҥо уулууллар.
Исписэлиис эппитинэн, икки ынах уулаах диэн сабаҕалыыллар. Күөххэ үктэнэр саҕана төрүүллэрэ буолуо диэн сабаҕалыыллар.
Ааптар: «Индигир уоттара» хаһыат, Муома улууһа
This post was published on 15.03.2022 13:01 13:01