28 Кулун тутар 28.03
  • -13°
  • $ 92,26
  • 99,71

Чурапчыга “Саллаат паартата” аахсыйа салҕанар

Ааптар хаартыскалара
Читайте нас на
Яндекс Новости
ЯДВ

Ааспыт сырыыга, Чурапчы улууһун бойобуой дьайыы бэтэрээннэрин Сэбиэтэ, Роман Ноговицын уонна Иван Давыдов ааттарын үйэтитэр паарталарын үөрэммит оскуолаларыгар туруорбуттарын туһунан билиһиннэрэн турабыт.

Оттон бүгүн, ыам ыйын 19 күнүгэр, Семен Новгородов аатынан Чурапчы орто оскуолатыгар эмиэ биир бэлиэ түгэн үүннэ. Ол курдук 4 уонна 10 кылаас үөрэнээччилэрин кабинеттарыгар Кавказ сэриитин бэтэрээннэрэ, оскуола выпускниктара Геннадий Местников уонна Влад Саввин ааттарыгар икки паартаны үөрүүлээх быһыыга-майгыга арыйдылар.

Александр Суворов аатынан уордьан кавалера Геннадий Местников паартатын иллээх-эйэлээх 10 кылаас кабинетыгар туруордулар, манна Геннадий Афанасьевич бииргэ төрөөбүт эдьиийэ Дария Маркова, балтыта Лия Омурова, оҕо сааһын табаарыһа Анатолий Захаров, бойобуой дьайыы бэтэрээннэрэ Мирон Игнатьев, Александр Саввин уонна Геннадий теннискэ тириэньэрэ Светлана Башарина кыттыыны ыллылар. Үөрэнээччилэргэ анаан Гена олоҕуттан быһа тардан сэһэргээтилэр, оҕолорго үөрэхтэригэр ситиһиини баҕардылар. Бу кылааска “Саллаат паартатыгар” бастакынан олорор чиэскэ, үөрэх туйгуннара Маша Филиппова уонна Антон Беляев тигистилэр.

Онтон “Аҕа дойдуга уонна ытык иэскэ бэриниитин” иһин мэтээл хаһаайына Влад Саввин паартатын олус талааннаах уонна көхтөөх 4 кылаас кабинетыгар туруордулар. Үөрүүлээх чааска Влад төрөппүт ийэтэ, СӨ Бэчээтин туйгуна, үлэ бэтэрээнэ Мария Саввина, огдообото Прасковья Саввина оҕолорунаан Виолалыын, Дарханныын, Сарыаллыын, Каролиналыын кытыннылар.

Кэпсэтиигэ бойобуой дьайыы бэтэрээннэрэ Олег Оконешников, Иван Адамов, Василий Монастырев кыттыстылар. Кылаас салайааччыта, СӨ үөрэҕириитин туйгуна Татьяна Николаевна Зырянова этиитинэн, “Саллаат паартатыгар” бастакынан үөрэх туйгуна Артем Седалищев уонна үчүгэй үөрэхтээх, анал байыаннай дьайыыга сулууспалыы сылдьар төрөппүт аҕалаах Коля Красильников олороннор, хаалбыт үөрэх дьылын түмүктүөхтэрэ.

Санатан эттэххэ, “Саллаат паартата” аахсыйа Чурапчы улууһугар быйылгыттан саҕалаан ыытыллан эрэр. Кэлэр нэдиэлэҕэ бойобуой дьайыы бэтэрээннэрэ, бойобуой доҕордоро Андриан Романов үөрэммит Таатта улууһун Кыйы нэһилиэгин орто оскуолатыгар паарта туруора айанныахтара. Түгэнинэн туһанан Чурапчы улууһун үөрэҕин салаатын начаалынньыгар Юрий Посельскай, Семен Новгородов аатынан Чурапчы орто оскуолатыгар бары кэлэктибиигэр, дириэктэр Надежда Уароваҕа дириҥ махталбытын тириэрдэбит.

Ааптар: Сэмэн Жендринскэй, Саҥа олох

Следите за самым важным и интересным в Telegram-канале и WhatsApp-группе ЯСИА