28 Тохсунньу 28.01
  • -48°
  • $ 73,82
  • 83,32

Чурапчыга «Саха сирин гектарын» ылыан баҕалаахтары испииһэктииллэр

Чурапчы улууһугар юридическэй сирэйдэргэ уонна биирдиилээн дьон бас билиилэригэр баар сир учаастактарын 52% кадаастыр учуотугар туруоруллубут. Ону таһынан хаалан турар, хаһаайына суох сирдэри чопчулааһын үлэтэ бара турар. Ити сирдэри «Уһук Илиннээҕи гектар», онтон кэлин «Саха сирин гектарын» чэрчилэринэн дьоҥҥо үллэриэхтэрэ.


«Сиргэ быраабы күүскэ регистрациялыыбыт. Гектар сири босхо биэрии чэрчитинэн үлэбитин барытын сүрүннээтибит. «Саха сирин” гектарын биэрии, биллэн турар биһиги интэриэспитигэр. Тоҕо диэтэххэ, улуус сүрүн дьарыга – тыа хаһаайыстыбата», — диэн СИА-ҕа муниципальнай баайы салайыы управлениетын кэмитиэтин салайааччыта Иван Васильев эттэ.

Хаһаайына суох сирдэр эмиэ атын улуустарга курдук, нэһилиэнньэлээх пуунтан тэйиччи бааллар. Ити сирдэргэ инвентаризацияны ыытар туһунан быһаарыы ылыллыбыт. Сир ылыан баҕалаах дьон испииһэктэрэ оҥоһуллар.

Васильев этэринэн, улуус олохтоохторо фермер, сайылык хаһаайыстыбатын тэрийэргэ уонна сайыннарарга улахан интэриэстээхтэр. Ону таһынан бултуур сирдэри ылыан баҕалаахтар бааллар.

«Бүгүн холобур, Хадаар нэһилиэгэр сырыттыбыт. Судаарыстыба өҥөтүн порталыгар регистрацияланарга Интернет суох буолан, дьон улахан мэһэйи көрсүбүт. Олохтоох дьаһалталарга маныаха көмөлөһөр дьон баар буолуохтара», — диир кини.

Сири бэйэ аатыгар суруйтарыыга улахан туох да кыһалҕа суох, кадаастыр инженердэринэн хааччыллыбыттар. Быраабы олохтооһуҥҥа биир эрэ государственнай регистратор баарынан үлэ атахтаммыт. «Ити боппуруоһу кадаастыр балаататын кытта быһаара сылдьабыт», —диир Васильев.

0
0
28 января 28.01
  • -48°
  • $ 73,82
  • 83,32