Хас биирдии улууска өбүгэ саҕаттан ордон кэлбит малы-салы, кыылы-сүөлү, докумуоннары, оройуон төрүттэниэҕиттэн устуоруйатын кэпсиир-көрдөрөр улахан суолталаах тэрилтэнэн мусуой буолар.
Быйыл саастан саҕалаан Чурапчытааҕы А.А.Саввин аатынан устуоруйа уонна этнография түмэлин дьиэтигэр капитальнай өрөмүөн ыытылынна. Бу үлэ бырайыага, сметата 2023 сыллаахха оҥоһуллан, улуус баһылыга Степан Саргыдаев бигэргэтэн, СӨ култуураҕа уонна духуобунай сайдыыга министиэристибэтигэр түһэриллибитэ уонна «Култуура» федеральнай национальнай бырайыакка хапсан бүгүҥҥү күҥҥэ түмүктэннэ. Бэдэрээччигинэн «ПД-Инжиниринг» хааччахтаммыт эппиэтинэстээх тэрилтэ (салайааччы Гавриил Платонов) үлэлээн, былааннаммыт үлэни-хамнаһы барытын ыйыллыбыт кэмигэр туттарда. Билиҥҥи туругунан түмэл экспонаттара туруорулла иликтэр, мусуой үлэһиттэрин ону көһөрөн миэстэтин булларыы түбүгэ күүтэр.
Түмэл үлэтэ култуура эйгэтэ буоларын быһыытынан балаҕан ыйын 11 күнүгэр СӨ култуураҕа уонна духуобунай сайдыыга миниистирэ Афанасий Ноев Чурапчы улууһугар кэлэн үлэлээтэ. Бастатан туран, кини Бахсы нэһилиэгэр тутулла турар Т.П.Местников аатынан норуот айымньытын дьиэтигэр үлэ хаамыытын сиһилии билистэ, саҥа эбийиэк үлэҕэ киириэхтээх кэмин чопчулаата итиэннэ туһааннаах соруктары туруорда. Онтон салгыы Чурапчы түмэлигэр сылдьан улуус баһылыга Степан Саргыдаевы, улуус баһылыгын тутуу уонна архитектура боппуруостарыгар солбуйааччыта Афанасий Дьячковскайы, култуура управлениетын начаалынньыга Петр Гуляевы, түмэл дириэктэрэ Афанасий Захаровы, үлэһиттэри, бэдэрээччиги кытары көрсөн кэпсэттэ, өрөмүөн түмүгүн көрдө-иһиттэ.
Афанасий Иванович: «Быйыл бу А.А.Саввин аатынан Чурапчытааҕы түмэл өрөмүөнэ национальнай бырайыак иһинэн үлэлиир «Капитальный ремонт муниципальных музеев» бырагырааманан оҥоһуллан түмүктэннэ. Бүгүн бу эбийиэги көрдүбүт, үлэни сиһилии билистибит. Онон биһиги маны барытын тэрийэн, хонтуруоллаан тиһэҕэр тиэрдибит дьоҥҥо — Чурапчы улууһун баһылыгар Степан Саргыдаевка, түмэл үлэһиттэригэр уонна чуолаан «ПД Инжиниринг» олохтоох бэдэрээт тэрилтэтигэр, салайааччы Гавриил Платоновка хойутааһына суох чопчу этиллибит кэмигэр үлэлэрин туттарбытыгар махталбытын тиэрдэбит. Маннык бырайыактар баар буоланнар кэнники кэккэ сылларга өрөспүүбүлүкэбит улуустарыгар Кэбээйигэ, Бүлүүгэ, Уус Майаҕа эмиэ мусуойдар өрөмүөннэннилэр, быйыл бу Чурапчыны таһынан Өлүөхүмэҕэ Саҕынньахтаахха эмиэ түмэлгэ өрөмүөн үлэтэ ыытылла турар. Онон «Култуура» национальнай бырайыак иһинэн анаан-минээн киирбит муниципальнай мусуойдары өрөмүөннээһиҥҥэ туһуламмыт бырагырааманы биһиги төһө кыалларынан туһанаммыт, бу хайысханан үлэ ыытарбыт үтүө түмүктэрдээх буолан эрэр диэн бэлиэтиэххэ наада. Оттон Чурапчы түмэлин үлэтэ саҥардыллыбыт сырдык, сылаас уораҕайга өссө тупсуо, кэҥиэ, тэтимириэ диэн эрэллээхпин»,-диэн санаатын үллэстэр.
Тустаах тэрилтэ үлэһиттэрэ бары даҕаны күннэтэ үлэлиир-хамсыыр тэрилтэлэрэ сырдаабытыттан, бэл кэҥээбит курдук буолбутуттан олус диэн сүргэлэрэ көтөҕүллэн сылдьаллар. Түмэл дириэктэрэ Афанасий Захаров: «Бүгүҥҥү күҥҥэ бу үөһэ куполбыт анныгар икки миэтэрэлээх кырасыабай люстра иилиллэрэ хаалла итиэннэ аҕыйах хонуктаах бытархай үлэ, ол кэннэ сыыйа экспонаттарбытын көһөрөн, сааһылаан саҕалыахпыт. Бэйэм өттүбүттэн улууспут салалтатыгар, аҕа баһылыкпытыгар Степан Саргыдаевка, СӨ култуураҕа уонна духуобунай сайдыыга миниистиригэр Афанасий Ноевка, бэдэрээччит тэрилтэбит салайааччытыгар Гавриил Платоновка махталбын тиэрдэбин»,-диэтэ.
Маны таһынан, түгэнинэн туһанан, улууспут баһылыга Степан Анатольевич, култуура управлениетын салайааччыта Петр Егорович, түмэл дириэктэрэ Афанасий Афанасьевич, үлэһиттэр экспонат элбэҕин, ону барытын харыстыырга, харайарга анал фондохранилище наадатын Афанасий Ивановичка тоһоҕолоон эттилэр, онно болҕомто ууралларыгар көрдөстүлэр, эбийиэк бырайыагын экраҥҥа сырдатан көрдөрдүлэр.
Наталья Сибирякова, Саҥа олох
