Быйыл «Муус устар» бэстибээл үһүс төгүлүн ыытыллар, тэрээһин Арассыыйаҕа Уһуйааччы уонна Саха Сиригэр Үлэ сылыгар ананар.
Бэстибээлгэ эдэр ыччат 13 хайысханан күрэхтэһиэҕэ, кэскиллээх бырайыактары билиһиннэриэҕэ. «Кинематограф и искусство», «Fashion», «Digital и IT», «Журналистика и блогинг», «Танцевальный квартал», «Молодой бизнес», «Молодой ученый» уо.д.а.
Кулун тутар 16 күнүгэр диэри, хас улуус аайы кыттааччылары талар түһүмэхтэр ыытылыннылар. Холобур, Чурапчыга бастыҥнары талан салгыы өрөспүүбүлүкэ таһымыгар ыытар туһугар, «Твой старт» диэн улуустааҕы ыччат бэстибээлин тэрийдилэр.
«Мин «Эдэр блог» диэн салааҕа эппиэтинэстээх этим. Улуустан биир киһини талан ыытаҕыт диэн ирдэбил кэлбитэ, онуоха бу «Эдэр блог» салаа тэрийээччилэрэ сүүмэрдиир түһүмэҕи бэйэбит ыытабыт диэбиттэрэ. Онон биһиги Чурапчыга бу салаанан кыттыан баҕарааччыларга Николь Егорованы кытары көрсүһүү тэрийбиппит. Баҕалаах уонна интэриэһиргиир дьоҥҥо олус туһалаах көрсүһүү буолбута», — диэн Чурапчы нэһилиэгин S.A.A.S ыччат түмсүүтүн бэрэссэдээтэлэ Марфа Петрова кэпсээтэ.
Быйыл Чурапчы улууһуттан барыта 50 кэриҥэ кыттааччы, өрөспүүбүлүкэтээҕи түһүмэххэ барара былааннанар. Сарсын кыттааччылар улуус баһылыга Степан Саргыдаевы кытары көрсүөхтэрэ.
Бэстибээл финала кулун тутар 25 күнүгэр Дьокуускай куоракка “Триумф” спортивнай комплексыгар буолуоҕа.
Тэрээһиҥҥэ олоҥхоҕо олоҕуран, «И так создавалась Земля…» диэн музыкальнай-мультимедийнай көрдөрүү презентацията буолуоҕа, манна толорооччу уруһуйу кытары дьүөрэлэһиэҕэ. Улахан кэнсиэр бырагырааматыгар эстрада эдэр артыыстара, «СулуСТАР»,«Созвездие танца», «ХомусВижн» куонкурус кыайыылаахтара кыттыахтара. Бэстибээл үөрүүлээх сабыллыытыгар олимпийскай чемпион Никита Нагорнай, хамаанданан күрэхтэһиигэр олимпийскай чемпион Камила Валиева уонна Леван Горзия- L’ONE кэлиэхтэрэ.
