Анал байыаннай дьайыы бэтэрээнэ Айтал Дьячковскай Чурапчы оройуонун Сылаҥ сэлиэнньэтин 5 № — дээх баһаарынай чааһыгар баһаарынайынан үлэтин саҕалаата. Үлэҕэ-хамнаска уонна социальнай боппуруостары быһаарыыга «Защитники Отечества» пуонда социальнай сүрүннээччитэ Сергей Атласов көмөлөстө.
Кини этэринэн, бэтэрээҥҥэ кэлим өйөбүл оҥоһуллубут: бойобуой дьайыылар бэтэрээннэрин дастабырыанньатын оңорууга көмө, сир учаастагын ылыыга көмөлөһүү уонна үлэҕэ ылыыга өйөбүл.
«Бу идэ кини анал байыаннай дьайыы зонатыгар толору көрдөрбүт хаачыстыбатын — хорсун быһыыны, тута реакцияны уонна бэйэни салайыныыны эрэйэр. Бэтэрээн үлэтин сэргэ Арктикатааҕы судаарыстыбаннай агротехнологическай университекка үөрэҕин салгыыр», — диэн бэлиэтээтэ Сергей Атласов.
Пуонда филиала тэрилтэлэри уонна уопсастыбаннаһы кытта бииргэ үлэлээһинэ бэтэрээннэргэ суһаллык көмөнү оҥорор кыахтааҕын эмиэ тоһоҕолоон бэлиэтээтэ.
Арассыыйа бэрэсидьиэнэ Владимир Путин сорудаҕынан тэриллибит «Аҕа Дойдуну Көмүскээччилэр» судаарыстыбаннай пуонда үлэҕэ киирии, социальнай адаптация уонна профессиональнай сайдыы боппуруостарыгар АБДь кыттыылаахтарын өйүүрүн салгыыр.
Саха сирин баһылыга Айсен Николаев урут бэлиэтээбитинэн, бүгүн бэтэрээннэри эйэлээх олоххо — үөрэтиигэ, үлэҕэ киллэриигэ уонна общественнай үлэҕэ тардыыга социальнай реабилитацияҕа уонна адаптацияҕа ураты болҕомто ууруллар.
This post was published on 17.02.2026 17:09 17:09