18 От ыйа 18.07
  • 18°
  • $ 88,09
  • 96,3

Чурапчы нэһилиэгин түөлбэлэрэ муус ылыытын саҕалаатылар

Читайте нас на
Яндекс Новости
ЯДВ

Чурапчы нэһилиэгин 375 сылынан, олохтоох дьаһалта көҕүлээһининэн, ТОС-тар икки ардыларыгар муус ылыытын күрэхтэһиитэ Мурун Тыымпыйаҕа саҕаланна. Манна сэттэ ТОС-тан биэс киһиттэн састааптаах хамаандалар номунуо хаардарын күрдьэннэр, анньыы тыаһа бэрт сытыытык кыычыгыраан иһиллэр.

“Муус ылыытыгар түөлбэнэн сылын аайы кыттыыны ылабыт. Биһиэхэ икки оскуола оҕото Дьулуур Попов, Радик Кривошапкин диэн уолаттар кыттыстылар, эдэр ыччаттартан Владислав Макаров диэн уолу ыллыбыт, эр дьоҥҥо Руслан Хоютанов уонна Василий Дьячковскай кытталлар. Былырыын үксүн анал байыаннай дьайыы кыттыылаахтарын дьиэ кэргэттэригэр муус таһаарбыт эбит буоллахпытына быйыл сүрүн болҕомтобутун  соҕотох олорор дьахталларга, аҥардас элбэх оҕолоох ийэлэргэ итиэннэ түөлбэбит олоҕор-дьаһаҕар көхтөөх аҕам саастаах дьоммутугар уурдубут. Бүгүҥҥү күҥҥэ барыта холбоон 8 ыалга муус таһаарыахпыт диэн суоттанан турабыт. Инникитин маннык күрэҕи, күүстээх үлэни улахан кылаас уолаттарыгар, ыччаттарга анаан тэрийиэххэ баар этэ. Олохпут төһө даҕаны балысханнык сайдыбытын иһин төрүт үгэспитин сүтэрэрбит сатаммат, эдэр дьоннор көрөн, ылсан инникитин даҕаны муус ылыахтара турдаҕа”, — диэн “Мурун Тыымпыйа” ТОС начаалынньыга Елена Семенова санаатын үллэһиннэ.

Билиҥҥи туругунан түөрт ТОС-тан хамаандалар кэлэннэр илин-кэлин түсүһэ сылдьаллар. Былырыыҥҥы күрэхтэһии муҥутуур кыайыылааҕынан, 30-ча массыына мууһу тиэйэн илдьибит “Куоҕалы” ТОС (сал. Федора Седалищева) буолар.

“Хамаандалар икки чаас устатыгар муус ылыахтара, анал бэлиэтэммит сиргэ муустарын соһон илдьэннэр туруоруохтара. Онтон кыайыылааҕы таһаарбыт чардааттарын иэнинэн ааҕан таһаарыахпыт. Чурапчы нэһилиэгин дьаһалтата сылын аайы бортобуой массыыналарыгар анаан 20-лии лиитэрэ гөрүүчэйи успуонсардыыр. Хамаандалар көхтөөхтөр, бу да сырыыга элбэх мууһу ылыахтара диэн эрэлбин улахан”, — Чурапчы нэһилиэгин Афанасий Софронов аатынан успуорт уораҕайын дириэктэрэ Михаил Степанов эттэ.

Сэмэн Жендринскэй

Ааптар хаарытыскаҕа түһэриитэ

Следите за самым важным и интересным в Telegram-канале и WhatsApp-группе ЯСИА
Тутаах тыллар