Илья Дьячковскай улахан фермерскэй хаһаайыстыбатын хотонугар түөрт уонна онтон үөһэ оҕолоох эдэр ыалларга ньирэй туттарыыта үөрүүлээх быһыыга-майгыга ааста.
Быйыл элбэх оҕолоох ийэлэри өйүүр «Ийэ хапытаала» улуустааҕы бырагыраама чэрчитинэн Петр Яковлев, Дьулус Макаров, Дмитрий Васильев, Филипп Марков, Василий Оконешников, Виталий Сивцев, Александра Сивцева, Иван Оконешников дьиэ кэргэттэрэ биирдии борооскуну бэлэх туттулар.
Мугудай нэһилиэгин баһылыга Николай Аммосов, эдэр ыалларга ньирэйдэри биэрбит бааһынай хаһаайыстыба салайааччыта Илья Дьячковскай эҕэрдэ тылларын этэн, тыа хаһаайыстыбатын исписэлииһэ У.Д.Слепцова сылаас алаадьынан алҕаан, бу дьиэ кэргэттэр бырагыраамаҕа хапсалларыгар докумуон өттүнэн үлэлэспит социальнай боппуруостарга специалист Е.Д.Сивцева тэрээһиҥҥэ кыттыыны ыллылар.
Сотору кэминэн Илья Дьячковскай хаһаайыстыбатыттан эмиэ бу бырагыраама чэрчитинэн Төлөй, Кытаанах, Хоптоҕо, Хатылы, Чурапчы нэһилиэктэрин элбэх оҕолоох ыаллара кэлэн ньирэйдэрин ылыахтара.
Дойдубут, өрөспүүбүлүкэбит үгүс оҕолоох дьиэ кэргэннэри өйүүргэ туһуламмыт араас таһымнаах көмөтүн таһынан Чурапчыбыт улууһа ыал социальнай-экономическай балаһыанньата бөҕөргүүрүгэр, тупсарыгар улахан болҕомтотун уурара олус кэрэхсэбиллээх.
Бырагыраама олоххо киирэригэр утары баран, 35 ньирэйи биэрэн төһүү күүс буолбут улууска тарбахха баттанар бөдөҥ хаһаайыстыба салайааччытыгар Илья Дьячковскайга махталбытын биллэрэбит.
Ааптар: Наталья Сибирякова, Саҥа олох
