14 От ыйа 14.07
  • 16°
  • $ 87,74
  • 95,76

Чурапчы Хоптоҕотугар алаастар ааттарын билиһиннэрэр каарта-схема сүрэхтэннэ

Читайте нас на
Яндекс Новости
ЯДВ

Бэҕэһээ Дириҥ бөһүөлэгэр “Хоптоҕо алаастарын ааттара” диэн каарта схеманы сүрэхтээһин дьоро тэрээһинэ буолла. Бу дьоһуннаах уонна кэскиллээх үлэни СӨ үөрэҕириитин үтүөлээх үлэһитэ, педагогическай үлэ бэтэрээнэ, география учуутала Анна Гаврильевна Борисова бэлэмнээн таһаартарда.

Биһирэм тэрээһиҥҥэ кэлбит нэһилиэк олохтоохторо каартаны көрөн-билсэн баран, сир-дойду ааттарын билиҥҥи уонна үүнэр ыччат билэригэр, сирдэр, алаастар ааттара симэлийэн, уларыйан хаалбаттарыгар, бигэтик иҥэн хаалалларыгар улахан үлэ оҥоһуллубутун бэлиэтээтилэр, тус санааларын үллэһиннилэр. Каартаны Анна Гаврильевна 50 ахсаанынан бэйэтин үбүнэн таһаартарбыт. Бу күн каарта барыта тута атыыга тарҕанна. Онуоха сүрүннээн эр дьон сэргээн туран атыыласпыта кэрэхсэбиллээх. Онон олохтоохтор баҕаларын учуоттаан, эбии таһаартарарга сакаас хомулунна.

Биһирэм тэрээһини нэһилиэк бибилэтиэкэрэ Марианна Прокопьевна Толстоухова иилээн-саҕалаан ыытта.

Нэһилиэк олохтооҕо Клара Максимовна Тарабукина: “Алаастар ааттарын билиһиннэрэр каарта-схеманы таһаартарыы улууспутугар бастакы үлэ буолуохтаах. Онон сир-дойду аатын каартаҕа киллэрэн, сурукка тиһэн киллэрии, кэлэр кэнчээри ыччакка хаалларыы кэскиллээх уонна үйэлээх өйдөбүнньүк быһыытынан сыаналанар. Итинэн сиэттэрэн, биир дойдулаахпытыгар Анна Гаврильевнаҕа махталбыт улахан”, –диэн санаатын үллэһиннэ.

Кырдьыга да оннук. Дириҥнэр бу үтүө холобурдарын улууспут атын нэһилиэктэрэ өйүөхтэрэ диэн эрэнэбит.

Анна Захарова, Саҥа олох

Следите за самым важным и интересным в Telegram-канале и WhatsApp-группе ЯСИА
Тутаах тыллар