9,3 МВт кыамталаах саҥа энергокомплекс Аллараа Халыма оройуонун Черскэй бөһүөлэгэр үлэҕэ киирдэ. Хомунаалынай эбийиэк үлэтин видео-конференц-сибээскэ Х Илиҥҥи экономическай форумҥа стартаатылар. Бу туһунан Саха сирин баһылыга Айсен Николаев иһитиннэрдэ.
«ВЭФ-2025 кэмигэр Черскэй бөһүөлэгэр саҥа энергокомплекс үлэтин саҕалаата! 9,3 МВт кыамталаах саҥа энергокомплекс үлэҕэ киирдэ. < … > Черскэй — урут эргэ АЭС-тан саахалланар туруктаах 280 км уһуннаах линияттан тутуллан турбут улахан суолталаах Арктика киинэ. Саҥа эбийиэк энергиянан хааччыйыыга хаачыстыбаны үрдэтиэҕэ», — диэн Айсен Николаев телеграм-ханаалыгар суруйда.
Кини этэринэн, энергокомплекс киириитин кытта 2,6 тыһыынча Черскэй олохтооҕо бигэ туруктаах уонна эрэллээх электроэнергиянан хааччыллыахтара.
Санатан эттэххэ, урут Черскэйгэ электроэнергия «Чукотэнерго» АК бас билэр Билибинскайдааҕы АЭС-тан 110 кВ «Встречный — Черскэй» линиятынан бэриллэрэ.
Саҥа энергокомплекс тутуллуутун туһунан сөбүлэһиигэ Саха сирин бырабыыталыстыбатын уонна «РусГидро» ПАО икки ардыларыгар 2022 сыллаахха илии баттаммыта.
«Бу Арктикаҕа уонна Уһук Илиҥҥэ аныгы энергокомплекстары тутууга «РусГидро» уонна чааһынай инвестордар улахан бырагыраамаларын сорҕото. Саха сиригэр хайыы- үйэ 13 итинник эбийиэк үлэлиир, инникитин — уонча саҥа эбийиэк. Саха сирэ туруктаах энергетикаҕа уонна дьон олоҕун хаачыстыбатын тупсарыыга өссө биир хардыыны оҥорор!» — диэн өрөспүүбүлүкэ баһылыга эбэн эттэ.
Санатар буоллахха, быйыл Кэбээйи оройуонун Сангаар бөһүөлэгэр уонна Өймөкөөн оройуонун Куйдуһун сэлиэнньэтигэр автоматизациялаах гибриднай энергокомплекстары киллэриэхтэрэ. Былырыын итинник эбийиэктэр Томпо Тополинайыгар, Өлүөхүмэ Дабааныгар, Урицкайыгар, Саҥыйахтааҕар, Өймөкөөн улууһун Өймөкөөнүгэр уонна Орто Балаҕаннаах сэлиэнньэлэригэр үлэлэрин саҕалаабыттара.
This post was published on 05.09.2025 16:33 16:33