Олунньу 22 күнүттэн кулун тутар 1 күнүгэр диэри инбэлиит дьон, устудьуоннар, элбэх оҕолоох ыал чилиэннэрэ уонна биэнсийэлээхтэр МАХ национальнай мессенджерыгар цифровой ID туһанан, култуура тэрилтэлэригэр босхо эбэтэр чэпчэтиини туһанан сылдьыахтарын сөп. Маннык тэрилтэлэргэ музейдар, театрдар, концертнай былаһааккалар уонна култуура-сынньалаҥ кииннэр киирэллэр. Акция «Дьиэ Кэргэн» президент национальнай бырайыагынан ыытыллар.
Акция чэрчитинэн баар дьаһаллар испииһэктэрэ «Культура.РФ» порталыгар «Культура поМАХимуму» анал салаатыгар, ону таһынан регионнааҕы култуура министиэристибэлэрин саайтарыгар бэчээттэннилэр.
«Россия култууратын министиэристибэтэ искусствоны, историяны интэриэһиргиир уонна киэҥ аудиторияҕа чугас буоларыгар туһуламмыт көҕүлээһиннэри көхтөөхтүк өйүүр. Биһиги саҥа улахан акцияны саҕалыыбыт. Дойду үрдүнэн култуура тэрилтэлэрэ кытталлар. Акция көлүөнэлэри түмэргэ, театрга эбэтэр музейга барыыны дьиэ кэргэҥҥэ барытыгар табыгастаах оҥорорго көмөлөһүөҕэ», – диэн биэдэмистибэ баһылыга Ольга Любимова бэлиэтээтэ.
Көхтөөх кыттааччыларга куоҥкурус
Олунньу 25 күнүттэн MAX-ка «Культура по МАХимуму» диэн анал чат-бот үлэлиэҕэ. Ыалдьыттар акциянан сылдьыбыт култуура тэрилтэлэригэр биллэр эбийиэги хаартыскаҕа түһэрэн онно ыытыахтарын сөп.
Кулун тутар 7 күнүгэр хас биирдии региоҥҥа акция чэрчитинэн саамай элбэх миэстэҕэ сылдьыбыт уонча кыайыылааҕы быһаарыахтара.
Санатан эттэххэ, Ил Дархан Айсен Николаев култуура-история нэһилиэстибэтин харыстыырга уонна искусствоны өйүүргэ өрөспүүбүлүкэҕэ 2026 сылы култуура сылынан биллэрбитэ. Кини өрөспүүбүлүкэ норуоттарын элбэх өрүттээх култуураларын биир төрүтүнэн уонна регион сайдыытыгар улахан суолталаах факторынан хаалбытын бэлиэтээтэ.
This post was published on 25.02.2026 11:05 11:05