Бэс ыйын 10 күнүгэр СӨ Ил Дархана Ил Түмэн иннигэр сыллааҕы отчуотун кэмигэр норуот дьокутаата, Өрөспүүбүлүкэтээҕи офтальмологическай балыыһа кылаабынай бырааһа Иван Луцкан чэпчэтиилээх эминэн хааччыйыы тиэмэтин көтөхтө, суруйда Саха парламент саайт.
Иван Луцкан этэринэн, өрөспүүбүлүкэҕэ ааспыт сылга арыллыбыт, аныгы оборудованиянан хааччыллыбыт 18 доруобуйа харыстабылын саҥа эбийиэктэрэ элбэх киһи ыарыытын буларга көмөлөһөллөр. Манан сибээстээн, чэпчэтиилээх эминэн хааччыйыы олус тоҕоостоох буолла.
«ОМС пундатын дааннайдарынан, нэһилиэнньэ 73 %-на өрөспүүбүлүкэ тас өттүгэр тахсыбакка, миэстэтигэр мэдиссиинэ көмөтүн ылаллар. Маныаха, саамай аныгы оборудованиялардаах, көһө сылдьар мобильнай биригээдэлэрдээх 18 доруобуйа харыстабылын саҥа эбийиэктэрэ төһүү күүс буолаллар. Бу нэһилиэнньэни мэдиссинэ көмөтүнэн хабыы ахсаанын үрдэтиигэ уонна хаан эргиирин, саахар диабетын, онкология ыарыыларын булуу бырыһыанын улаатыытыгар тиэртэ. Өрөспүүбүлүкэбит Ил Дарханыгар нэһилиэнньэҕэ көмөлөөх бырагыраамалары олоххо киирэллэрин иһин махтанабын. Ол эрээри бу чэпчэтиилээх эмп ороскуота улаатарыгар тиэрдэр», – диэтэ норуот дьокутаата.
Ил Дархан Айсен Николаев тустаах дьон наадалаах эмтэрин кэмигэр ылалларын ситиһэр сыалтан чэпчэтиилээх эминэн хааччыйыыга 900 мөл. солк. кэриҥэ үп көрүллүө диэн эрэннэрдэ.
Иһитиннэрии уонна хаартыска: https://t.me/doctorlutskan
