Кангаласска баһаарынайдар бырачыастыыр аахсыйаларынан сибээстээн, Евгений Чекин ыыппыт суһал мунньаҕар премьер хамнаска иэһи уонна хааччыллыы боппуруоһун быһаарарга эттэ. Иккиһинэн, Саха сирин баһаары утары сулууспатын салайааччытын дуоһунаһыгар төһө сөптөөҕүн саарбаҕалыырын биллэрдэ.
Санатан эттэххэ, субуотаҕа Кангаласстааҕы баһаары утары сулууспатын 14 үлэһитэ аччыктааһыны биллэрбитэ. Кинилэр салалтаҕа кэккэ пууннары туруорбуттара: хамнастара 30-35 тыһыынча эрэ, аһары үлэлээтэхтэринэ, төлөммөт, хааччыллыы мөлтөх, бириэмийэлэрэ быһыллыбыт.
Баһаарынайдар ирдэбиллэрин туһунан Евгений Чекиҥҥэ өрөспүүбүлүкэ Судаарыстыбаннай хааччыйыыга госкэмитиэтин бэрэссэдээтэлэ Юрий Зайцев дакылааттаабыта. Кини Кангаласска тиийэн бырачыастааччылары кытта көрсүбүтэ.
Евгений Чекин өрөспүүбүлүкэ баһаарынай сулууспатын салалтата тоҕо бу балаһыанньаны суһаллык быһаарбатаҕын ыйытта. Сулууспа начаалынньыга Николай Иванов кини 2016 с. үлэҕэ киирэригэр 40-с этэрээт үлэтигэр кэккэ кэһиилэр баалларын, олор сөптөөх таһымҥа туоратыллыбатахтарын эттэ.
Кини нуорманы таһынан үлэлээһиҥҥэ иэһи толуйууга 113 мөл наадатын, итиччэ үп биэдэмистибэҕэ суоҕун, хааччыллыыттан астыммат баһаарынайдары сайыҥҥы уонна кыһыҥҥы кэмпилиэгинэн хааччыйбыттарын, ол эрээри атах таҥаһа эрэ тиийбэтин туһунан отчуоттаата.
Вице-премьердэртэн биирдэрин кытыннаран, бырабыыталыстыба хамыыһыйатын тэрийэр наадатын эттилэр.
СИА.
