Бүгүн иккис күнүн Чөркөөххө «Мин туйгун норуотум — айар күүс кыһата» култуурнай-үөрэтэр форум үлэлиир.
Форум биир улахан тэрээһининэн Былатыан Ойуунускай аатынан Судаарыстыбаннас түмэлигэр Уһук Илин уонна Сибиир «ВООПИиК-Восточный вектор» дойду иһинээҕи история уонна култуура пааматынньыктарын уопсастыбаннай тэрилтэлэрин лидердэрэ кыттыылаах төгүрүк остуол тэриллибитэ буолла.
Мунньаҕы ВООПИК бэрэссэдээтэлэ, РФ бэрэсэдьиэнин иһинэн үлэлиир култуура уонна искусство Сэбиэтин чилиэнэ Артем Демидов иилээн-саҕалаан ыытта. Манна Алтайтан, Туваттан, Новосибирскай уобаластан, Красноярскай кыраайтан уо.д.а. регионнар бэрэстэбиитэллэрэ кэлэн архитектура мэҥэ өйдөбүнньүгүн харыстыыр үлэни ыытарга инники соруктарын сырдаттылар, түмсэн бииргэ үлэлииргэ ыҥырдылар. Маннык историческай памятниктары харыстыыр, үлэни ыытар сыаллаах форумнар кэмиттэн кэмигэр ыытыллыахтарын наадатын эттилэр.
Маны тэҥэ Артем Демидов Чөркөөх түмэлин өрөмүөҥҥээһиҥҥэ ылсыбыт меценаттарга «Тааттаавтодор» салайааччытыгар Иван Бочониҥҥа, «Монтажник» ХЭО салайааччытыгар Александр Ханиҥҥа, Чөркөөх музейыгар хас да эбийиэги реставрациялаан оҥорбут Юрий Дедюкиҥҥа, Чөркөөхтөөҕү политсыылка музейын салайааччытыгар Николай Поповка Махтал суруктары туттарда.
Улахан делегацияны СӨ култуура нэһилиэстибэтин эбийиэктэрин харыстааһыҥҥа Департамент салайааччыта Николай Макаров салайан илдьэ кэллэ.
Төгүрүк остуол түмүгүнэн резолюция ылылынна.
Светлана Халгаева, Чөркөөх
