15 От ыйа 15.07
  • 27°
  • $ 87,74
  • 95,76

Чөркөөххө "Мэндэҥэ суһума" саахыматчыттары түмэр

Фото: Светлана Халгаева
Читайте нас на
Яндекс Новости
ЯДВ

Кырдьаҕас Чөркөөххө «Черкехский рапид-Мэндэҥэ суһума» өрөспүүбүлүкэтээҕи таһымнаах саахымакка түргэн оонньууга турнир ыытылынна. Нэһилиэккэ урукку сылларга А.Е.Кулаковскай-Өксөкүлээх Өлөксөй олорор эрдэҕиттэн саахымат дьоро киэһэлэрэ ыытыллаллара. Бу туһунан норуот суруйааччыта, Өксөкүлээх Өлөксөй үөрэнээччитэ Д.К.Сивцев-Суорун Омоллоон ахтан аһарбыта баар. 

Бу ыытыллар «Мэндэҥэ суһума» саахыматчыттар күөн көрсүүлэрэ САССР үтүөлээх учуутала, СССР спордун маастара, удьуор саахыматчыт Мэндэ Тихонович Таппыровка ананна. Кини аҕатын Тихон Семенович Таппыровы өй, тулуур спордугар — саахымакка  чугас аймаҕа П.А.Ойуунускай бэйэтинэн  уһуйбута биллэр. Кыһыҥҥы киэһэлэргэ Былатыан Ойуунускайга дьиэлэнэ олорон саахыматынан үлүһүйэн туран оонньууллара диэн кэпсэнэр.

Санатан аастахха, былырыын баччаларга Чөркөөх музейыгар Саха сирин үс төгүллээх чемпионката Анна Афанасьевна Протодьяконова үбүлүөйдээх сааһынан эмиэ саахымакка турнир олохтонон турар. Онон Былатыан Ойуунускай аатынан музейга саахымат оонньуута ыытыллара үтүө үгэскэ киирэн эрэр.

Икки күннээх турнирга 100-кэ саахыматчыт кытынна. Оҕолорго чемпионнарынан Айвар Колесов уонна Наташа Михайлова, улахан дьоҥҥо Майа орто оскуолатын 11-с кылааһын үөрэнээччитэ, өрөспүүбүлүкэ икки төгүллээх чемпиона Денис Назаров бастакы үрдэлин ыһыктыбата. Денис Назаров саахымакка уһуйааччытынан  Владимир Мэндэич Таппыров  буолар. Онон  Улуу Ойуунускай уһуйбут уолуттан  өрөспүүбүлүкэҕэ биллэр удьуор саахыматчыт Таппыровтар үөскээтилэр.

Иккис күн Денис Назаров улахан дьоҥҥо уонна оҕолорго сеанс биэрдэ, содуобаҕа илин эҥэр улуус оонньооччулара муһуннулар.

Турниры салайар Дмитрий Мосорин бэлиэтээбитинэн, «Мэндэҥэ суһума» тэрээһини сылын аайы ыытарга былаанныыбыт диэтэ. Эһиилги саахымат турнира учуутал, Аҕа дойду Улуу сэриитин кыттыылааҕа Наум Трифонович Слепцов үбүлүөйдээх сылыгар ананыаҕа диэн этэр.

Онтон тоҕо «Мэндэҥэ суһума» диэн ааттанна диэтэххэ, кыһыҥҥы дьыбардаах түүн мэндэҥэ сулус (созвездие Ориона) эрэ чаҕылыччы тыгар. Бу чаҕылыйар сулус аатын саахыматчыт Тихон Семенович уолугар Мэндэҕэ иҥэрбит.

Онон саахымат оонньуута бары өттүнэн чаҕылыччы тыган, инники күөнүн аныгы  үйэ  уустук  технологияларыгар сабырыйтарбакка, сулус буолан, чахчы да,  чаҕылыйа тыгар.

Ааптар: Светлана Халгаева, Таатта

Хаартыскаларга: Былатыан Ойуунускай музейыгар саахымакка турнир түгэннэриттэн.

Следите за самым важным и интересным в Telegram-канале и WhatsApp-группе ЯСИА