Чүүйэлэр хайҕаннылар

Ходоро нэһилиэгэр «Василий Степанов аатынан культура уонна спорт эстафетата» фестивалга I Наахара нэһилиэгин дьоно-сэргэтэ ыалдьыттаатылар.

Тэрээһин саҕаланыытыгар Василий Константинович Степановы киинэҕэ устан үйэтиппиттэрэ көрдөрүлүннэ. СӨ култуураҕа уонна духуобунай сайдыыга министиэристибэтин норуот айымньытыгар сүрүннүүр специалиһа Сардаана Брызгалова: «Культура уонна спорт эстафетатыттан тирэх ылан, «Спорт ‒ тыа сиригэр» фестиваль алтыс сылын ыытыллыбыта кэрэхсэбиллээх», — диэн бэлиэтээтэ.

Мэҥэ Хаҥалас оройуонун депутаттарын Сэбиэтин бэрэссэдээтэлэ Андрей Находкин: «Киэҥ историялаах, уос номоҕо буолбут түгэннэрдээх эстафетаны кэлэр да сылларга чиэстээхтик ыытыахпыт, ханнык да улуус кыайан хатылаабат үтүө үгэһэ оҥоһулунна. Көлүөнэттэн көлүөнэҕэ харыстабыллаахтык салҕанан иһэригэр баҕалаахпыт«, — диэн эттэ.

Оһуохай күрэҕэр ыччат дьонтон Василий Игнатьев уонна Мария Скрябина таһаарыылара биһирэннэ. Уус-уран оҥоһуктар быыстапкаларыгар 20 кыттааччы 189 үлэни туруорда. Лауреаттарынан Февронья Нестерова, Александра Иванова, Николай Дмитриев, Валентина Тимофеева, Ольга Аргунова, Елена Федорова, Наталья Левина ааттаннылар. Олохтоохтор эстафета историятын көрдөрөр стендэлэрэ, альбомнара, биир дойдулаахтара Василий Степанов туһунан сиһилии билиһиннэрэр матырыйааллара хайҕанна.

I Наахара нэһилиэгин олохтоохторун кэнсиэриттэн «Эҕэрдэ үҥкүүтэ» (сал. Саргылана Захарова, Тамара Гермогенова), Филипп Захаров салайааччылаах тойуксуттар бөлөхтөрө, трио толоруутугар «Үрүмэччи маҥан ат» ырыа, чабырҕахсыттар (сал. Валентина Трофимова), «Үргэл» эр дьон вокальнай ансаамбыла, Давид Трофимов ырыата, «Дабаан» кантри бөлөх (сал. Давид Трофимов) лауреат, «Алып» хомусчуттар ансаамбыллара, «Дьиэрэҥкэй» үҥкүү, хор коллективтара дипломант аатын сүктүлэр.

Спорт күрэхтэһиилэригэр чүүйэлэр кыайыыны ситистилэр.