Хаандыга бөһүөлэгэр Томпо улууһун киин библиотекатыгар быысапканан үлэлэр быыстапкалара буола турар. Манна дьон араас темаҕа оҥоһуллубут олус үчүгэй ис хоһоонноох үлэлэрин дуоһуйа көрөҕүн.
Ол курдук кыттааччылар араас идэлээх дьахталлар. Кинилэр истэригэр учууталлар, эмчиттэр, редакция үлэһитэ, таҥара дьиэтин старостата уо.д.а. бааллар. Дьахталлар быысапкалаабыт үлэлэрэ олус кэрэтин таһынан уустугун сөҕөҕүн.
Саргылаана Попова Хаандыга алын сүһүөх оскуолатын саха кылааһын учуутала, икки обургу уол амарах ийэтэ. Кэргэнэ Гаврил Попов – улуус бастыҥ хаартыскаҕа түһэрээччитэ. Саргылаана Анатольевна урут иннэлээх сабы туппат бэйэтэ билигин иэйиитэ киирдэҕинэ айылҕа көстүүлэригэр хартыыналары быысапкалыырын сөбүлүүүр. Онон икки айар дьоҕурдаах дьон олоҕу тэҥҥэ көрөллөр.
Наталья Даниленко улуустааҕы хаһыат верстальщига. Холку майгылаах эдэр ыал ийэтэ иллэҥ кэмигэр таптал, таҥара тематыгар оҥорбут хартыыналара киһи болҕомтотун тардаллар. Дьарыктаммыта 5 – 6 сыл буолла.
Библиотекарь Ирина Колодезникова: «Каролина Ефимова Теплай Ключка олорор. 3 оҕолоох эдэр ийэ фельдшеринэн үлэлиир. Син быыстатан – арыттатан сөбүлүүүр дьарыгар бириэмэ булар.
Светлана Казакова атыттартан уратыта диэн үлэлэрэ оҕуруонан оҥоһуллубуттар. Арай хахайы билэр дьахтара быысапкалаабытын көрөн үтүктүбүт. Таҥаратын мэтириэтин сибэтии гыннаттарбыт.
Ыал ийэтэ Анна Варламова үлэтэ олус түбүктээх. Кини социальнай үлэһит, кырдьаҕастары дьиэлэригэр баран көрөр-харайар, эмтэрин, астарын атыылаһар. Кини аатырар худуоһунньук Исаак Левитан «Кыһыл көмүс күһүн» үлэтин тоҕус ыйы быһа быысапкалаабыт. «Син биир оҕону төрөтөр курдук», — диэн күлэр.
Кэрэни хайдах да бу 1-кы, бу 2-с миэстэ диэн араарбаккын. Онон быыстапка кыттыылаахтара бэлиэтэниэхтэрэ эрээри кыайыылаах диэн суох буолуоҕа. Арай дьон бэйэтин санаатын тэтэрээккэ суруйан хаалларар. Оттон быыстапка кэнниттэн быысапкалыыр баҕалаах маҕаһыынтан атыылаһан бэйэтэ дьарыктаныан, сөбүлүүүр хартыынатын үтүгүннэриэн сөп.
This post was published on 17.05.2016 16:37 16:37