Булуҥ улууһун Быыкабыгар дьон дьиэлэрин киин ититэр ситимҥэ холбооһун сүрүн тыын кыһалҕалара буолар. Билигин дэриэбинэ аҥаара киин ититэр ситимҥэ холбоммокко маһынан оттон олорор.
Кэнники сылларга мас баранан, дьиэлэр ититэр ситимҥэ холбоноллоро хайаан даҕаны наадатын ыйаллар. Иккиһинэн, нэһилиэнньэ саҥа оскуола тутуутун туруорсар. Ол курдук Быыкап нэһилиэнньэтэ сылтан сыл элбиир, хаҥыыр. Былырыын оскуола 76 үөрэнээччилээх эбит буоллаҕына, быйыл 7 үөрэнээччинэн элбээбит. Санатан эттэххэ, Быыкаптааҕы оскуола агро-оскуола буолан турар, маны этэн туран, оскуоланы бүтэрээччи оҕолор “рыболов-обработчик” идэтин ылан тахсалларын, ону таһынан снегоходу уонна квадроциклы ыытар бырааптаналларын оскуола дириэктэрэ Гаврил Иванов этэр. Маны таһынан олохтоохтору пограничниктар кэлиилэрэ, бэрэбиэркэлээһиннэрэ долгутар. Кырдьаҕас саастаах дьон мас мастыырга, булунарга чэпчэтии көрүллэр харчыта тоҕо кыратын туоһуластылар. Отчуокка Сбербанк үлэтигэр ыйытыктар эмиэ умнуллубатылар.
Бырабыыталыстыба отчуотун кэмигэр үөрэҕирии уонна наука миниистирин солбуйааччы Эдуард Кондратьев саҥа оскуола тутуутун былаана 2023-2024 сылларга баарын эттэ. Итиэннэ нэһилиэккэ үс сыл тухары үлэлээбэтэх Сбербанк салаата уонна дьон туттарыгар терминал бу сотору арыллан үлэтин саҕалыа.
