Саха сирин бырабыыталыстыбатын бэрэссэдээтэлин солбуйааччы Ольга Балабкина салайар отчуоттуур бөлөх олунньу 5-6 күннэригэр Горнай улууһун бары нэһилиэнньэлээх пууннарыгар сырытта. Оройуоҥҥа саамай сүрүн үтүө көрдөрүүлэр ортолоругар оҕо төрөөһүнэ сыллата эбиллиитэ буолара бэлиэтэннэ.
Нэһилиэнньэ көхтөөх кыттыыны ылла, отчуоттарга 619 киһи хабылынна. Тэҥнээн көрдөххө, былырыын бырабыыталыстыба отчуотугар Горнай улууһун 606 олохтооҕо кыттыбыта.
«2025 сыллаахха Саха Өрөспүүбүлүкэтигэр ыччат байыаннай-патриотическай иитиитигэр ураты болҕомто ууруллубута. Ити Аҕа дойду Улуу сэриитигэр Кыайыы 80 сылын бэлиэтээһини уонна историческай өйү-санааны харыстааһыны кытта сибээстээх этэ. Саха сирин баһылыгын уонна бырабыыталыстыбатын болҕомтото Аҕа дойду Улуу сэриитин кыттыылаахтарын өйүүргэ уонна чиэстииргэ туһуламмыта. Саха сирин баһылыга Айсен Николаев бары патриотическай уопсастыбаннай, судаарыстыбаннай уонна муниципальнай тэрилтэлэр ыччат дьыалатыгар уонна социальнай коммуникацияҕа министиэристибэтин эгидатынан холбоспуттарыгар дьаһал таһаарбыта. 2025 сыл бүтүүтүгэр Дьокуускайга «Патриот» ыччат киинэ аһыллыбыта, ыччат сынньанар былаһаакката эрэ буолбакка, патриотическай иитии киинэ буолбута. Бу уопут ыччаты төһө кыалларынан хабаары, улаатан эрэр көлүөнэни төрөөбүт дойдуну таптыыр, историятын, үгэстэрин ытыктыыр тыыҥҥа иитээри оройуоннарга тарҕатыллыбыта», — диэн СӨ бырабыыталыстыбатын толоруулаах уорганнарын отчуотун Ольга Балабкина саҕалаата.
Горнай улууһугар саамай сүрүн үтүө көрдөрүүлэр ортолоругар вице-премьер оҕо төрөөһүнэ сыл аайы элбиирин эттэ. «Горнай улууһугар оҕо төрөөһүнэ сыл аайы эбиллэн иһэринэн өрөспүүбүлүкэҕэ соҕотох оройуон буолар. 2025 сыллаахха Саха сиригэр 10 327 оҕо төрөөбүтэ, онтон 131 оҕо Горнай улууһугар күн сирин көрбүтэ. Биһиги өрөспүүбүлүкэбит сиригэр 35 тыһыынча кэриҥэ элбэх оҕолоох ыал олорор, кинилэр ахсааннара куруук эбиллэн иһэр. Кэнники биэс сылга – 2020 сылтан 2025 сылга диэри — элбэх оҕолоох ыаллар ахсааннара 15% улаатта», — диэн бырабыыталыстыба бөлөҕүн салайааччыта Ольга Балабкина иһитиннэрдэ.
Социальнай газтааһыҥҥа президент бырагырааматын олоххо киллэрии чэрчитинэн 2021 сылтан Саха сиригэр 10 тыһыынчаттан тахса дьиэ гааһынан хааччылынна, ол иһигэр Горнай оройуонун киинигэр – Бэрдьигэстээх сэлиэнньэтин «Заречнай» микрооройуонугар гаас киирдэ. Маны сэргэ Бэрдьигэстээххэ Россия президенэ Владимир Путин көҕүлээбит «Олох инфраструктурата» национальнай бырайыак «Ыраас уу» федеральнай бырайыагын чэрчитинэн уу ыраастыыр тутуулар үлэҕэ киирдилэр. Бэрдьигэстээх нэһилиэгин маастар-былаана оҥоһулунна.
Отчуоттарга олохтоохтор салайааччыларга ыйытыылары биэрэн, хоруйдары ыллылар. Ол курдук, Бэрдьигэстээххэ бэтэрээн Евдокия Тарасова демографияны тупсарыыга, доруобуйаны харыстааһыҥҥа санаатын үллэһиннэ. Оройуон киинигэр гимназия дьиэтин, искусство оскуолатын, оҕо саадтарын тутуу, эргэрбит уонна саахалланар дьиэлэртэн дьону көһөрүү бырагырааматын олоххо киллэрии, эминэн-томунан хааччыйыы, «Земскэй учуутал», «Земскэй быраас» уонна «Земскэй тренер» бырагыраамалыры олоххо киллэриигэ боппуруостарын биэрдилэр.
Нэһилиэктэргэ социальнай эбийиэктэргэ сырыттылар, дьон Ольга Балабкинаҕа сүрүн туруорсар боппуруоһа — доруобуйа харыстабылын тэрилтэлэрин кадрынан хааччыйыы буолла.
