Россия бырабыыталыстыбатын кириисиһи утары үлэтин үһүс түһүмэҕэ экономика тэтимин тутар миэрэлэргэ ананыаҕа. Бэлэмнэнии үлэтэ барар, ол туһунан Михаил Мишустин солбуйааччыларын кытта мунньахха этилиннэ. «Экономика министиэристибэтэ этиилэри тиһэҕэр тириэрдэргитигэр уонна муус устар 30 күнүгэр бырабыыталыстыба көрүүтүгэр киллэрэргитигэр«, — диэн сорудахтаата бэрэссэдээтэл, суруйар «Российская газета».
Эпидемиологическай балаһыанньа тупсуутун хаамыытын көрөн миниистирдэр кабинеттара хас да этаабынан сорох тэрилтэлэргэ уонна предпринимателлэргэ хааччахтааһыны уһулуоҕа. Нэдиэлэ бүтүөр диэри, премьер санаппытынан, сорох министиэристибэлэр уонна биэдэмистибэлэр онно сөптөөх этиилэри килллэриэхтээхтэр.
Билигин кириисиһи утары үлэ иккис түһүмэҕэ олоххо киирэр. Дьону уонна экономиканы коронавирус тарҕаныытын кэмигэр өйөөһүн. «Бырабыыталыстыба манна анаан наадалаах нуорма баазатын ылыммыта», — бэлиэтээтэ Мишустин.
Туспа тутан кини медицина үлэһиттэригэр эбии төлөбүр туһунан эттэ. Чуолаан кинилэр коронавируһу кытта охсуһалларын бэлиэтээтэ. Төлөбүр нолуоктан босхоломмутун санатта. «Российскай Федерация субъектарын баһылыктара медиктарга регионнааҕы эбии төлөбүрдэри тохтоппоккутугар», — премьер-миниистир губернатордарга туһаайан эттэ.
