21 Тохсунньу 21.01
  • -48°
  • $ 73,82
  • 83,32

Быраастар оҕону түһэртэрии кыһалҕалара билигин да баарын эттилэр

17:54, 14 марта 2016
Текст:

Саха сирин дьахталларын ХIV съеһин чэрчитинэн «Доруобай ийэ, доруобай оҕо» тиэмэҕэ «төгүрүк остуол» буолла. Съезд бу былаһааккатын Дьокуускай куораттааҕы Медицина киинин кылаабынай бырааһа, м.н.к. Елена Борисова салайан ыытта. Сүрүн иһитиннэриилэри Дьокуускай куорат доруобуйа харыстабылыгар управлениетын салайааччыта, м.н.к. Лена Афанасьева, доруобуйа научнай-чинчийэр институт Аһылык киинин салайааччыта, м.н.к. Ульяна Лебедева уо.д.а. оҥордулар.


Төгүрүк остуолга оҕо күүтэр дьахталлар доруобуйаларын харыстабылын дьүүллэстилэр. Ону сэргэ төрүүр саастаах дьахталларга искэн ыарыытын эрдэ булуу, доруобай аһылыкка оскуола саастарыттан иитии, оҕо үөскээһинигэр төрөппүттэр эппиэтинэстээх буолууларын уо.д.а. боппуруостары көрдүлэр.

Кыттааччылар Саха Өрөспүүбүлүкэтигэр демография көрдөрүүлэрэ социальнай-экономическай балаһыанньаттан тутулуктаахтарын бэлиэтээтилэр. «Оҕону түһэртэрии (ол иһигэр сокуоннай саастарын ситэ илик кыргыттар) кыһалҕалара билигин да сытыытык турар. Арыгыны, наркотигы туһанар оҕо күүтэр дьахталлар тустарынан чахчылар, социальнай кыһалҕалар үгүс боппуруостара билигин да быһаарылла иликтэр», — диэн буолла.

Өрөспүүбүлүкэ улуустарыттан кэлбит эмчиттэр, доруобуйа харыстабылын салайааччылара элбэх боппуруостары биэрэн, тустаах эппиэттэри ылан хааллылар. Ордук оҕо хаатын шейкатыгар үөскүүр искэни эрдэттэн сэрэтиигэ саҥа ньымалары дириҥэтэн ыйыталастылар.

Дьүүллэһии кэнниттэн СӨ Судаарыстыбаннай Мунньаҕар (Ил Түмэҥҥэ), Бырабыыталыстыбаҕа, Доруобуйа харыстабылын министиэристибэтигэр туһаайыллыбыт съезд резолюциятын бырайыагар этиилэри киллэрдилэр. Ол иһигэр, төрүү илик оҕо доруобуйатын харыстабылыгар ситиһиилэммит уонна оҕо түһэртэрэ кэлбит дьахтар быстах санаатын уларытарга көмөлөспүт (медицинскэй көрдөрүүтүн учуоттаан) эмчиттэри бириэмийэлээһин боппуруостара киирдилэр.

0
0
21 января 21.01
  • -48°
  • $ 73,82
  • 83,32