Быраас, мэдиссиинэ билимин хандьыдаата Ньукулай Павлов — Халан «Аныгы куоратчыт быраабылата» диэн ааттаан бэйэтин санаатын СИА-ҕа ыытта.
— Ыраах барбат буоллаххына оптуобустаныма
— Оптуобустанар буоллаххына бэрчээккигин устума, элбэх сиртэн тутуспакка буола сатаа, кэпсэтимэ (холобур, төлөпүөнүнэн)
— Билэр киһигин уулуссаҕа көрүстэххинэ өр кэпсэтимэ (ыксыыбын, төлөпүөннэһиэхпит диэххин сөп), тэйиччи тур, илии тутуһума (ол оннугар сутуругунан таарыйсыахха сөп)
— Лиибинэн тахсаргар ыалларгын кытта кииримэ, кыратык кэтэһэ түс, оттон түһэргэр сатыы кирилиэһинэн түһэргэ үөрэн
— Лааппыга күн аайы сылдьыма, хас да хонуктаах аскын эрдэ хаһаан, ыалтан биир киһи (уочаратынан буолуон сөп) сылдьыахтаах, батыаккалаһымаҥ. Икки буолан сылдьар түгэҥҥитигэр лааппыга бииргит киирдин, иккискит таһырдьа кэтэстин
— Дьиэҕэ кэлээт, сирэйгин-хараххын суун, муннуҥ иһин, күөмэйгин уунан сайҕан
— Олорор, үлэлиир дьиэҥ салгынын күҥҥэ иккитэ-хаста уларытан салгылатар ордук (тымныйбат туһугар хостон хоско көһө сылдьан)
— Тэрилтэттэн тахсан иһэн илиигин эминэн соттон аас (санитайзер иҥин аан аттыгар баар буолар)
— Оптуобустан, тэрилтэттэн тахсан баран хаста да аа-дьуо эҕирийэн баран күүскэ салгынна таһааран муннуҥ иһин, күөмэйгин ыраастаа
— Өскөтө күөмэйиҥ ыарыйдаҕына, муннуҥ уута сүүрдэҕинэ үлэҕэр барыма, биир-икки хонук кэтэнэ түс
— Анаалыс туттарбыт буоллаххына, ол түмүгэ биллиэр диэри ханна да быгыалаама
— Быһыы (вакцина), ханнык баҕарар эмп курдук, сүүс бырыһыан быыһаабат. Ону өйдөөҥҥүн, ылан да баран, син биир манна этиллибити тутуһа сырыт
— Вирус киһиттэн эрэ сыстарын умнума. Ыалдьыбыт да түгэҥҥэр, дьоҥҥо сыһыарбатахха ыарыы эйигинэн кэлэн тохтоон хаалыахтаах. Чэгиэн буол!
