Саха сиригэр 2026 сылга 75 км регионнааҕы суол учаастактарын, ол иһигэр тирэх ситим суолларыгар 32 км, ону тэҥэ 100 погон миэтэрэ искусственнай тутуулары нормативнай турукка киллэрэр былааннаахтар. Бу туһунан өрөспүүбүлүкэ массыына суолун управлениетын генеральнай директорын бастакы солбуйааччы Егор Ефимов «Саха сирэ 24» телеханаалга «Актуальное интервью» биэриигэ иһитиннэрдэ.
«Өрөспүүбүлүкэҕэ суол-тутуу сезона кулун тутарга саҕаланар. <…> Билигин бэлэмнэнии үлэтэ бара турар, ол иһигэр тутуу уонна инертнэй матырыйааллары регионнааҕы суоллары тутуу, саҥардыы уонна өрөмүөннээһин эбийиэктэригэр тиэйии», – диэн Егор Ефимов кэпсээтэ.
Кини этэринэн, быйыл «Абалаах», «Амма», «Анаабыр», «Бөтүҥ», «Бороҕон — Танда», «Кэбээйи», «Мухтуйа», «Нам», «Өймөкөөн», «Тикси» уонна «Умнас» регионнааҕы суол учаастактара өрөмүөннэниэхтэрэ.
Сүрүн үлэлэрэ РФ президенэ Владимир Путин сорудаҕынан олоххо киирэр «Инфраструктура для жизни» национальнай бырайыак, ону тэҥэ «Биир Ньыгыл Россия» баартыйа «Куттала суох суоллар» федеральнай бырайыагын чэрчитинэн ыытыллаллар. Национальнай бырайыак дьон олоҕор-дьаһаҕар тупсаҕай, куттала суох эйгэни үөскэтиигэ туһуланар уонна 2024 сыллаахха түмүктэммит «Куттала суох хаачыстыбалаах суоллар» бырайыак салҕыыта буолар.
Санатан эттэххэ, 2019 сыл бүтүүтүттэн 2024 сылга диэри «Куттала суох хаачыстыбалаах суоллар» национальнай бырайыак чэрчитинэн Саха сирин массыына суолларын управлениетын бэдэрээттэһэр тэрилтэлэрэ 1200 км тахса региональнай суолу нормативнай турукка киллэрбиттэрэ.
