Хас сыл аайы балаҕан ыйын иккис бээтинссэтигэр арыгыта суох олоҕу киэҥник тарҕатыы күнэ Саха сирин баһылыгын уурааҕынан бэлиэтэнэр. Бу күн арыгыны атыылааһын өрөспүүбүлүкэ үрдүнэн бобуллар.
Арыгы атыытын хонтуруоллуур судаарыстыбаннай тэрилтэ быйыл балаҕан ыйын 9 күнүгэр арыгыны, ол иһигэр пиибэни атыылааһыны тохтотор туһунан ыҥырар.
Атыы тэрилтэлэрэ бу туһунан иһитиннэриилэри эрдэттэн таһаарыахтаахтар.
«Тэрилтэ салайааччылара, кэтэх предпринимателлэр! Өрөспүүбүлүкэтин, оҕолорун, сиэннэрин инникилэрин туһугар сүрэҕинэн-дууһатынан ыалдьар хас биирдии киһи арыгылааһыны утары буолуохтаах», — диэн управление туһулаан этиитигэр суруллар.
