Бүлүү улууһун тыатын хаһаайыстыбатын департамена сылын аайы ыам ыйыгар сайаапканан Дьокуускайдааҕы көтөр фабрикатын кууруссаларын аҕалтарарын нэһилиэнньэ хамаҕатык атыылаһар.
Дьон үксүгэр кууруссаны сайыҥҥы кэмҥэ тутаары, оҕолоругар сибиэһэй сымыыты сиэтээри ылаллар. Маҕаһыыннарга аҕыйах сыллааҕыта 10 тахса солкубайга атыыланар сымыыт билигин 19 солкуобайга диэри үрдээбитэ дьону сөхтөрөр.
Тыа хаһаайыстыбатын департаменын сүрүннүүр испэсэлииһэ, улуус кылаабынай зоотехнига Эдуард Михайловбилиһиннэрбитинэн, быйыл саас Бүлүү улууһун олохтоохторугар Дьокуускайдааҕы көтөр фабрикатыттан 2100 сымыыттыы сылдьар куурусса аҕалыллан атыыламмыт.
Ааспыт нэдиэлэҕэ оҥоһуллубут бастакы рейскэ Бүлүү куоратыгар диэри сытар нэһилиэктэргэ икки массыынанан 1100 куурусса аҕалыллан атыыламмыт.
Бэҕэһээ, ыам ыйын 29 күнүгэр Бүлүү куоратыгар икки массыынанан тиэллэн кэлбит 1 тыһыынча кэриҥэ куурусса атыыта тэриллибитэ. Быйыл 1,5 саастаах сымыыттыы сылдьар «Хайлайн» боруода биир кууруссатын сыаната 650 солк. тэҥнэстэ.
Дьон-сэргэ сылын аайы сымыыттыы сылдьар куурусса атыыта тэриллэрин сэргииллэр.
Ааптар: Николай Куприянов, Олох суола хаһыат
This post was published on 30.05.2024 17:02 17:02