18 От ыйа 18.07
  • 20°
  • $ 88,09
  • 96,3

Быйыл 81 саҕалааччы фермер 1,5-3 мөлүйүөннээх көмө үбү ылыа

15:44, 31 марта 2018
Текст:
Читайте нас на
Яндекс Новости
ЯДВ

Саха сиригэр саҥа үлэлээн эрэр фермердэр ортолоругар грант ылааччылары сүүмэрдиир куонкурус хамыыһыйата бу нэдиэлэҕэ үс күнү быһа үлэлээтэ. Бүтэһиктээх официальнай түмүк тахса илик эрээри, куонкурус хайдах ааспытын кэрэһилиир сыыппаралар бааллар.


Саната таарыйа эттэххэ, 2012 сылтан саҕалаан федеральнай уонна өрөспүүбүлүкэ бүддьүөттэриттэн кыттыгас көрүллэр маннык көмө үбүнэн 618 саҕалааччы фермер туһанна. Муҥутаан, 2016 сыллаахха 234 киһи ылбыта. Былырыын 66 фермер тиксибитэ. Ити иннинээҕи сылларга кыайыылаахтарга барыларыгар 1,5-лыы мөл. солкуобай көрүллэр эбит буоллаҕына, былырыыҥҥыттан өйөбүл кээмэйэ улаатыннарыллан, ынах сүөһүнү иитии салаатыгар туруммуттар (39 киһи) 2 мөл. 400 тыһыынчаттан 2 мөл. 700 тыһыынчаҕа тиийэ ылбыттара. Ааспыт сылга бу хайысхаҕа өрөспүүбүлүкэ үбүн холбоон, 145 мөл. солкуобайы биэрбит буоллахтарына, быйылгыларга 174,5 мөл. солкуобай көрүлүннэ.

Онон, сэрэйбиппит курдук, грант үбүгэр тиксээччи ахсаана быйыл балачча эбилиннэ. Министиэристибэҕэ барыта 276 киһиттэн сайаапка киирбититтэн, хамыыһыйа 37 сайаапканы ирдэбилгэ эппиэттээбэт диэн сыыйан, куонкуруска 239 “саҥа саҕалааччы” кытынна. Балартан 81 киһи сиидэни ааста. Хомойуох иһин, 158 киһи сөптөөх баалы ылбакка, эһиил өссө холонон көрөр буолла. Ол эбэтэр үстэн биир фермер көмө үбү ылар дьоллонно. Грант суумата 1,5 мөлүйүөнтэн 3 мөлүйүөҥҥэ диэри халбаҥныыр. Биллэн турар, ынах сүөһүнү иитиигэ туруммуттар ботуччу ылыахтара. Сүүмэрдээһини ааспыттартан 60 бырыһыаннара ынах сүөһүнү дэлэтэр былааннаахтар. Барыта 19 улуустан кэлбиттэр. Хаһан да буоларыныы, киин уонна илин эҥээрдээҕи улуустартан көхтөөхтүк кытыннылар. Бүлүү сүнньүттэн сунтаардар, ньурбалар, бүлүүлэр элбэхтэр. Ньурбаттан 8 оҕолоох ийэ кыттан кыайда. Чечня сэриитин кыттыылаахтара эмиэ бочуокка сылдьаллар.

Сунтаар Бүлүүчээнигэр оскуолаҕа дириэктэрдээбит Андрей Максимов хортуоппуй, оҕуруот аһын хаһаанар эбийиэги туппутун, онтун үрдүгэр аны тэпилииссэ тутта сылдьарын өйөөтүлэр.

Оттон Дьааҥыга Барылас нэһилиэгэр баһылыктаабыт Иван Стручков племенной сылгы иитэ сылдьарын сэҥээрбэтилэр. Бука, сылгы онто суох элбэх диэтэхтэрэ…

Саҕалааччы фермеринэн тыа сиригэр регистрацияламмыт күнүттэн аахтахха, 24 ыйтан (2 сылтан) элбэҕэ суох кэмҥэ үлэлии сылдьар РФ олохтооҕо билиниллэр. Былырыыҥҥа диэри “3 сыл иһигэр ИП-бааһынай хаһаайыстыба тэринэн үлэлии сылдьыбатах буолуохтаах” диэн ирдэбил баара. Бу пууну ылан кэбиспиттэр. Онон, эрдэ үлэлии сылдьан туох эмит төрүөтүнэн тохтообут бааһынайдарга хааччах суох оҥоһуллан, кыттааччы ахсаана эбиллэригэр суол аһылынна. Иккиһинэн, мантан инньэ федеральнай үп кыттыгастаах дьаһалы үбүнэн хааччыйыы (абаанса) оҥоһулларыгар саҕалааччы фермер федеральнай хааһына тэрилтэтигэр сирэй счет арынара ирдэниллэр. Бу сүүмэрдээһини ааспыттарга эрэ сыһыаннаах. Аны, үсүһүнэн, балаһыанньаҕа биир боччумнаах эбии баар: урукку сылларга бизнес-былаан ороскуотугар хаартан иҥнибэт көлө (“Буран”) көрүллүбэт этэ, табаһыттар, сылгыһыттар маннык көлөтө суох сатамматтарын аахсан,  быйылгыттан киллэрдилэр.

Следите за самым важным и интересным в Telegram-канале и WhatsApp-группе ЯСИА