Саха сирин Ойуур сыһыаннаһыыларыгар департамена сир аһын үргээһин болдьоҕун олохтоото.
Ол курдук, от ыйын 10 күнүттэн саҕалаан Таатта уонна Нам улуустарыгар дьэдьэниэххэ сөп буолла. Оттон от ыйын 12 күнүттэн – Хаҥаласка, 15-16 күннэриттэн — Илин эҥэр уонна Бүлүү бөлөх улуустарга.
Хаптаҕас от ыйын ортотуттан Илин эҥэр улуустарга ситиэҕэ. От ыйын 20 күнүттэн Саха сирин соҕуруу оройуоннарыгар хаптаҕастыахха сөп. Оттон хоту улуустарга от ыйын 25-тэн атырдьах ыйын 1-гэр диэри хаптаҕас буһуоҕа. Оттон сугуну от ыйын 20-ттэн хомуйуохха сөп.
Атырдьах ыйын ортотуттан моонньоҕон уонна отон ситэр. Киин оройуоннарга атырдьах ыйын 22 күнүттэн саҕалаан бу сир аһын үргүүр көҥүллэнэр. Ый ортотуттан – Бүлүү бөлөх улуустарга.
Малина ордук Бүлүү улуустарыгар өлгөмнүк үүнэр. От ыйын 25 күнүттэн хомуйуу көҥүллэнэр.
Сир аһын үргээһин болдьоҕун туһунан сиһилии Ойуур сыһыаннаһыыларын департаменын саайтыгар билсиэххэ сөп.
