Олунньу 12-14 күннэригэр Намҥа Н.Н.Тарскай кэриэһигэр Саха Өрөспүүбүлүкэтин көҥүл тустууга биирдиилээн уонна хамаанданан бастыыр иһин чемпионата ыытыллар.
Манан сибээстээн Нам улууһун спорка управлениетын начальнига Павел Иванову кытта телефонунан сибээстэһэн, миэстэҕэ туох бэлэмнэнии үлэтэ бара турарын туоһуластыбыт.
«Биллэрин курдук, быйыл Саха сиригэр көҥүл тустуу сайдыбыта 60 сыла, — диир Павел Гаврильевич. – Маннык кэрэ бэлиэ түгэҥҥэ чемпионаты бэлэмнээн уонна тэрийэн ыытар сүрдээх эппиэтинэстээх. Биһиэхэ, Намҥа, өрөспүүбүлүкэ тустууга чемпионата урут хаһан даҕаны ыытылла илигэ. Чемпионаты бэлэмнээн уонна тэрийэн ыытыыга улуус баһылыга Александр Атласов бэрэссэдээтэллээх анал хамыыһыйа тэриллэн үлэтин үгэнигэр сылдьар. Итини тэҥэ хамаандалары, ыалдьыттары аһатыыга-хоннорууга, транспорынан, сибээһинэн хааччыйыыга, культурнай программаҕа, бэрээдэги көрүүгэ, наҕараадалааһыҥҥа о.д.а. анал хамыыһыйалар тэриллэн үлэлииллэр. Күрэхтэһиини ааттаан ити күннэргэ Намҥа барыта 450-500 киһи кэлэрэ буолуо. Хамаандалар чугастыы, оскуолаларга олохсуйуохтара».
Чемпионакка элбэх бочуоттаах ыалдьыт кэлэрэ күүтүллэр. Россия тустууга федерациятыттан судьуйалааһыны кэтээн көрөөччүнэн (техническэй делегатынан) норуоттар икки ардыларынааҕы категориялаах судьуйа Солтан Засеев кэлэрэ күүтүллэр.
Күрэхтэһии оҕо спортивнай оскуолатын саалатыгар икки көбүөрүнэн ыытыллыаҕа. Барыта 600 киһи олорон көрөр усулуобуйатын тэрийиэхпит. Чемпионаты үөрүүлээхтик аһыыны уратытык оҥоруохпутун баҕарабыт. Ханныгын да иһин, улахан таһымҥа тахсан иһэбит. Кылгас, чуолкай буолуо дии саныыбын. Киирии билиэт сыанатын туһааннаах исписэлиистэр ырытыһан баран быһаарыыларынан, эбиэккэ диэри – 200, эбиэттэн – 300 солк. диэн быстылар. Тустууну “Саха” иһитиннэрэр-көрдөрөр хампаанньа бэйэтин сайтыгар быһа көрдөрөрө былааннанар.
Үбүлүөйдээх чемпионата тоҕо куоракка буолбакка, Намҥа ыытылларый диир буоллахха, миэстэҕэ, тыа сиригэр тустуу эмиэ сайдыахтаах. Атын даҕаны улуустар маннык күрэхтэһиини тэрийэр кыахтаахтар. Барыта табылларыгар баҕарабыт. Билиҥҥитэ бэлэмнии үчүгэйдик баран иһэр. Маассабай спорт управлениетыттан уонна тустуу федерациятыттан салайааччылар кэлэн чемпионат ыытыллыытын боппуруостарын көрөн-истэн, сүбэлээн барбыттара.
Чемпионат бырагыраамата: олунньу 13 күнүгэр, сарсыарда 09.00 чаастан – 57, 65, 74, 97 кг ыйааһыннарга барыллааһын хапсыһыылар, 15.00 – чемпионаты үөрүүлээхтик аһыы, 16.00 – финаллар. Олунньу 14 күнүгэр, сарсыарда 10.00 чаастан – 61, 70, 86, 125 кг ыйааһыннарга барыллааһын хапсыһыылар, 16.00 – финаллар.
This post was published on 11.02.2016 17:51 17:51