Бу өрөбүллэргэ «Өрөгөй» споркомплексыгар 14 бөҕөс «Дыгын оонньууларыгар» холонуо. Пандемиянан сибээстээн күрэх кыттыылаахтарын урукку көрдөрүүлэринэн таллылар. Көрөөччүтэ суох ыытыллар күрэхтэһии бүтэһик быһаарыылаах киирсиитин ахсынньы 6 күнүгэр саха дьоно тэлэбиисэринэн быһа биэриигэ көрүөхтэрэ.
Быйылгы кыттааччылар улахан аҥардара — «Дыгын оонньууларын» сэттэ төгүллээх чөмпүйүөнэ Ивана Белолюбскай салайар «Боотур» спортивнай кулууп иитиллээччилэрэ.
«Биһиги кулууптан Егор Филиппов, Николай Матаннанов, Дьулустан Ноговицын, Алексей Уваровский, Айсен Семенов, Павел Друзьянов уонна саҥа кыттааччылар Егор Свинобоев уонна Никита Новгородов киирсиэхтэрэ. Егор Свинобоев 70 кг диэри ыйааһыннаахтарга өрөспүүбүлүкэ многоборьеҕа чөмпүйэнээтигэр иккис миэстэни, Никита Новгородов 70 кг үөһээлэргэ — үсүһү ылбыттара. Онон «Дыгын оонньууларыгар» кыттар толору бырааптаахтар. Быйылгы сыл дьарык чааһыгар ыарахан буолла. Ким ханна, хайдах кыахтааҕынан бэйэтэ дьарыктанна. Онон спортсменнар туруктарын туһунан этэр ыарахан», — диир Иван Белолюбскай.
Бүтэһик түгэҥҥэ күрэххэ Петр Старостин кыттарын туһунан биллэрбит. Кини «Дыгын оонньууларыгар» сэттис кыттааһына буолуо. «2014 сыллаахтан тохтоло суох кыттабын. Быйыл оонньууларга буоларын курдук сайын бэлэмнэммитим, онтон буолбат буолбутугар эһиилгигэ былааннаммытым. Чурапчыга олорор буолан Оксана Эверстоваҕа дьарыктанабын, ол эрэн күрэх көһөн былааннаан дьарыктаныы суоҕа. Онон күрэххэ бэлэм туһунан этэр уустук. Түһүлгэ көрдөрүө. Сылын аайы бэйэбэин тургутан күрэххэ кыттабын, быйыл да оннук», — диэтэ Петр Старостин.
Күрэхтэһии иккис түмүктүүр күнүн НВК «Саха» быһа эфиргэ күнүс 14 ч. киэһэ 18 ч. диэри көрдөрүө. Маны таһынан ютубка nvk—online.ru ханаалга көрүөххэ сөп буолуо. Күрэхтэһии буолуо үс күн иннинэ спортсменнар коронавируһунан ыалдьыбаттарын туһунан ыспыраапка аҕалыахтара.
Күрэхтэһээччилэр:
- Варданян Артем (Нам улууһа)
- Друзьянов Павел (Чурапчы)
- Колесов Иннокентий (Кэбээйи)
- Матаннанов Николай (Таатта)
- Новгородов Никита (Уус-Алдан)
- Ноговицын Дьулустан (Горнай)
- Протодьяконов Алексей (Томпо)
- Свинобоев Егор (Мэҥэ-Хаҥалас)
- Семенов Айсен (Өлөөн)
- Старостин Петр (Чурапчы)
- Уваровский Алексей (Кэбээйи)
- Федоров Владимир (Ньурба)
- Филиппов Егор (Хаҥалас)
- Филиппов Леонид (Амма)
This post was published on 30.11.2020 11:05 11:05