Саха сиригэр сааскы күн-дьыл туруга суох. Ааспыт нэдиэлэҕэ Дьокуускайга уонна кэккэ оройуоннарга дьиҥнээх хаар буурҕа ытыйбыта. Бүгүн күнү-дьылы кэтээн көрөөччүлэр хаар силлиэ уонна сөкүүндэҕэ 20 миэтэрэҕэ тиийэр күүстээх тыал түһүө диэн сабаҕалыыллар.
“Муус устар 2 күнүгэр Мирнэйгэ, Ленскэйгэ, Өлүөхүмэҕэ, Ньурбаҕа, Сунтаарга, Бүлүүгэ уонна Үөһээ Бүлүү оройуоннарыгар сарсыарда уонна күнүс арҕааттан, хотугулуу-арҕааттан сөкүүндэҕэ 13-18 миэтэрэ түргэннээх тыал түһэрэ күүтүллэр. Алдан, Нерюнгри оройуоннарыгар хаардыа, сорох сиринэн хотугулуу-арҕааҥҥы тыал сөкүүндэҕэ 15-20 миэтэрэ тиийиэҕэ”, — диэн Саха сирин күнү-дьылы билгэлээччилэрин сайтыгар этиллэр.
This post was published on 02.04.2018 12:18 12:18