Өрөспүүбүлүкэтээҕи анал (коррекционнай) оскуола-интернат 2, 3 уонна 4-с кылаастарын үөрэнээччилэрэ балаҕан ыйын 1 күнүгэр Брайль шрифтыгар саха тылын учебниктарын ыллылар. 2027 сылга диэри бырайыак ааптардара бары начаалынай уонна орто кылаастары маннык кинигэлэринэн хааччыйар санаалаахтар. Бу туһунан И.Н.Егоров-Горнай аатынан хараҕа суох, хараҕа мөлтөх дьоҥҥо анал бибилэтиэкэттэн иһитиннэрдилэр.
«Российскай Федерацияҕа рельеф-точкалаах Брайль шрифтынан кинигэлэри национальнай тылларга таһаарыы, бастатан туран, хараҕа суохтар регионнааҕы анал бибилэтиэкэлэринэн ыытыллар. Ити судаарыстыбаннай уонна официальнай тыллары харыстааһыҥҥа уонна сайыннарыыга туһуламмыт өрөспүүбүлүкэтээҕи бырагыраамалар өйөбүллэринэн кыаллар буолла. Саха сирэ хараҕа суох, хараҕа мөлтөх оҕолорго тиийимтиэ үөрэхтээһин эйгэтигэр бастыҥ уопуту көрдөрөн бу үлэҕэ көхтөөхтүк кыттар», — диэн иһитиннэриигэ этиллэр.
Бырайыак «Саха Республикатыгар государственнай уонна официальнай тыллары харыстааһын уонна сайыннарыы» судаарыстыбаннай бырагыраамаҕа киллэриллибитэ уонна үөрэх уонна тыл бэлиитикэтин эйгэтигэр бастыҥ хайысха быһыытынан регионнааҕы таһымҥа өйөнөр.
2024 с. бастакы тираж – кыра оскуола саастаах оҕолорго анаммыт «Букубаар» диэн саха букубаарын таһаарыы — түмүктэммитэ. Учебник анал үөрэх тэрилтэтин усулуобуйатыгар үөрэх сылын устата толору апробацияланна. Төрөөбүт тыл төрүттэрин баһылаабыт үөрэнээччилэр быйыл 2-с кылааска көһөн, бырайыак көдьүүһүн уонна практическай суолталааҕын бигэргэттилэр.
Бүтүн Россиятааҕы таһымҥа эмиэ үрдүк сыанабыл бэрилиннэ. «Букубаар” бүтүн Россиятааҕы бэчээт уонна полиграфическай бородууксуйа куонкурустарын икки номинациятыгар кыайыылааҕынан таҕыста – “Сыл Бастыҥ профессиональнай кинигэтэ” уонна “Бастыҥ үөрэх кинигэтэ».
Саҥа учебниктары адаптациялааһыҥҥа элбэх сыллаах уопуттаах тифлопедагогтар Инна Балбахова, Мария Ушницкая-Алехина, Анна Егорова үлэлээтилэр.
