Уус Алдан улууһун Бороҕон нэһилиэгин Оҕо искусство оскуолатыгар материальнай-техническэй база лаппа бөҕөргөөтө. Дойду президенэ Владимир Путин көҕүлээбит «Дьиэ кэргэн» национальнай бырайыагын чэрчитинэн саҥа музыкальнай инструменнар, аныгы оборудованиелар уонна үөрэтэр матырыйааллар баар буоллулар.
«Музыкальнай отделениеҕа элбэх музыкальнай инструмены атыыластылар — бу «Соната» пианино, баяннар, домралар, балалайкалар, саксофоннар, гитаралар, флейталар, скрипка, ону тэҥэ музыкальнай инструменнарга комплектующай тэриллэр, нотнай литература уонна үөрэх босуобуйалара. Итинник тэрээһин оҕолорбут талааннарын арыйыыга уонна уопсайынан, үүнэр көлүөнэ духуобунай сайдыытыгар үтүө сабыдыаллаах», — диэн музыкальнай отделение сэбиэдиссэйэ, теоретическай дисциплиналар учууталлара Инга Ильина бэлиэтээтэ.
Уус-уран отделениеҕа мольберттар, натюрмордары сырдатар софиттар, быыстапкаларга офис фетровай сабыылара, мобильнай компьютернай кылаас, графическай планшеттар, мобильнай быыстапка стендата уонна экспозиционнай панеллэр киирдилэр. Хореография отделениетыгар хореография станога, дорҕоон оборудованиелара уонна сиэркилэ ылылынна.
«Билигин 68-с сылын үлэлиир Бороҕон искусство оскуолатыгар сиэннэрим үөрэнэллэр, олортон биирдэстэрэ баян кылааһыгар, иккиһэ фортепиано кылааһынгар. Бу үөрэх дьылыгар оскуолабыт маннык оборудованиены атыыласпытыттан төрөппүттэр олус үөрэллэр. Оскуола материальнай өттүнэн хааччыллыбыт буоллаҕына, ол үөрэх хаачыстыбатыгар биллэн турар сабыдыаллыыр», — диэн Чараҥ сэлиэнньэтин олохтооҕо Прасковья Горохова эттэ.
Оскуоланы хааччыйыыга 3 мөл. 200 тыһ. солк. суумалаах субсидия көрүллүбүтэ, онтон үксэ федеральнай бюджеттан киирдэ. Ити үөрэх процеһын саҥа таһымҥа көтөҕүөҕэ, оҕолор айар үлэҕэ интэриэстэрин лаппа үрдэтиэҕэ.
Дойду президенэ Владимир Путин көҕүлээбит «Дьиэ кэргэн» национальнай бырайыагын чэрчитинэн быйыл өрөспүүбүлүкэҕэ сэттэ оҕо искусство оскуолата 27 мөл.солк. тахса суумалаах саҥа музыкальнай инструменнарынан, оборудованиеларынан уонна үөрэтэр литературанан хааччылынна.
This post was published on 06.11.2025 10:03 10:03