Бороҕоҥҥо аҕам саастаах көлүөнэ киинэ арылынна

Бүгүн, бэс ыйын 26 күнүгэр, РФ Социальнай фондатын Саха сиринээҕи пенсионнай уонна социальнай страхованиеҕа фондатын отделениетын улуустааҕы салаатын офиһыгар “Мүрү” диэн ааттаах аҕа көлүөнэ дьон түмсэн, сэһэргэһэр киинин үөрүүлээх арыллыыта буолла.

Бу анал киин “Дьиэ кэргэн” национальнай бырайыак уонна РФ “Гражданнары социальнай өйөбүл” бырагырааматын иһинэн “Аҕа саастаах көлүөнэ” бырайыак чэрчитинэн тэрилиннэ. Киин сүрүн сыалынан-соругунан улуус биэнсийэ саастаах олохтоохторо РФ Биэнсийэҕэ уонна социальнай страховкаҕа фондатын оҥорор өҥөлөрүн билсии, бу өҥөлөрү электроннай форманан ылыы, биэнсийэ уонна социальнай страховка боппуруостарыгар билиини кэҥэтии буолар. Клиентскэй сулууспа исписэлиистэрэ аҕам саастаах дьоммутугар фонда оҥорор өҥөлөрүгэр судаарыстыбаннай өҥө көмөтүнэн биэрэргэ үөрэхтэри ыытыахтара, талааннарын арыйыахтара, түмсүүлэр тэриллиэхтэрэ. Дойдубутугар анал байыаннай дьайыыга сылдьар уолаттарбытыгар көмө оҥорорго киин кыттыылаахтара эмиэ кытыыһыахтара.

Үөрүүлээх аһыллыыга Дьокуускайтан РФ Саха сиринээҕи пенсионнай фонда уонна социальнай страхование салаатын урпавляющайа Марина Герман, СӨ Биэнсийэлээхтэрин холбоһугун бэрэссэдээтэлэ Юрий Михайлов, улуус баһылыгын солбуйааччы Анатолий Сторожев, Уус Алданнааҕы Клиентскай сулууспа салайааччыта Руслан Белолюбскай кыттан, бэйэлэрин эҕэрдэлэрин, баҕа санааларын тиэртилэр. Кырдьыга да, маннык кииҥҥэ биэнсийэҕэ таҕыстыбыт диэн биир дьиэҕэ хатаммакка, обществоҕа туһалаах, итиэннэ аныгы олох инники сайдыытыгар тэҥҥэ хардыылаһан, сэргэх олохтоох буолуу хас биирдии сааһырбыт киһи ырата буолуохтаах, онно бүгүн саҥа арыллыбыт киин биллэр-көстөр оруолу ыларыгар саарбахтаабыппыт.

Бэлиэ күнүнэн улуус тэрилтэлэрин салайааччылара илии тутуурдаах кэлэн, истиҥ эҕэрдэлэрин, инникитин да биир ситимнээх үлэлииргэ баҕа санааларын, идеяларын кытта үллэһиннилэр. Ол курдук, улуус бэтэрээннэрин Сүбэтин бэрэссэдээтэлэ Олег Федоров, улуустааҕы нэһилиэнньэ социальнай көмүскэлин кэлим киинин салаайаччытын солбуйааччы Елена Кривошапкина, улуустааҕы киин балыһа кылаабынай бырааһын солбуйааччы Сахаяна Васильева, улуустааҕы культура салаатын начальнига Сергей Нафанаилов, улуустааҕы кииннэммит библиотека тиһигин дириэктэрэ Иван Копырин, Мүрү нэһилиэгин баһылыга Прокопий Румянцев, МФЦ исписэлииһэ Нарыйа Павлова, “Россельхозбаан” салайааччыта Айталина Новогодина, “Мой бизнес” предпринимателлэр ассоциацияларын салайааччыта Сардана Олесова эҕэрдэлэрин тиэртилэр.

Улууспут биэнсийэлээхтэринСойууһун бэрэссэдээтэлэ , үлэ бэтэрээнэ Любовь Захарова, итиэннэ түмсүү кыттыылаахтара анал түмсэр миэстэлэммиттэриттэн олус астыннылар. Итиэннэ инникитин бу анал хос аана мэлдьи аһаҕас буоларыгар, сыллата биэнсийэҕэ тахсыбыттар эбиллэн, инники үлэ араас хайысханан кэҥээн иһэригэр сыалланан-соруктанан,бииргэ түмсүүлээхтик үлэлиир күүстээх санаалаахтар.

Светлана Сивцева, Мүрү Саһарҕата