Норуот маастара, духуобунас академига, П.А. Ойуунускай аатынан судаарыстыбаннай бириэмийэ лауреата, култуура үтүөлээх үлэһитэ, «Азия Оҕолоро» норуоттар икки ардыларынааҕы пуонда стипендиата, Таатта улууһун бочуоттаах гражданина Борис Федорович Неустроев-Мандар Уус 80 сааһын туолуутугар АЛРОСА 2024 сыл сэтинньитигэр Накыыҥҥа хостоммут 51,39 караттаах алмааска кини аатын иҥэрдэ.
Борис Федорович Неустроев-Мандар Уус алтынньы 20 күнүгэр 1945 сыллаахха Алексеевскай оройуон Баайаҕа нэһилиэгэр (билигин Таатта улууһа) төрөөбүтэ. Мэҥэ Хаҥалас оройуонун Төҥүлү орто оскуолатын бүтэрбитэ.
1969 сылтан физкультура учууталынан, 2005 сылтан Баайаҕа орто оскуолатын дириэктэрин инновационнай үлэҕэ солбуйааччытынан үлэлээбитэ. “Манадар” устуудьуйа салайааччыта. Мандар Уус А.Е. Кулаковскай «Ойуун түүлэ», А. И. Кривошапкин «Евразийскай Сойуус» кинигэлэригэр философскай ис хоһоонноох уруһуйдарын ааптара, «Саха орнаменнара», «Саха ойуута-мандара», «Көмүс уустарыгар көмө» уонна да атыттар кинигэлэрин ааптардара, ону таһынан Баайаҕа нэһилиэгэр 1941-1945 сыллардааҕы Аҕа дойду Улуу сэриитин дьоруойдарыгар анаммыт пааматынньыктар ааптардара.
Кини салалтатынан Таатта улууһун Ытык Күөл с. уопсастыбаннай -культурнай киинин, Дьокуускайга «Арчы» духуобунай киинин уус-уран оҥоһуута толорулунна. Кини философскай идеялара 2011 сыллаахха Таатта улууһун Баайаҕа нэһилиэгэр аһыллыбыт «Мандар Уус» култуура уонна духуобунас киинин үлэтин төрүтүгэр тирэх буолбуттара. Неустроев — Мандар Уус үлэлэрэ араас таһымнаах элбэх улуустааҕы, өрөспүүбүлүкэтээҕи уонна бүтүн Россиятааҕы быыстапкаларга туруоруллубуттара.
Былырыын Дьокуускайга маастар 80 сылыгар аналлаах үбүлүөйдээх тэрээһиннэр, ол иһигэр «Кыталык ырыата» диэн быыстапка буолан, саха үгэс буолбут тимир ууһа технологиятынан оҥоһуллубут оригинальнай хомустары, «Кыталык ырыата» композиционнай үлэни уонна «Көмүс уустарыгар көмө» кинигэни көрдөрдүлэр.
This post was published on 22.01.2026 14:03 14:03