Бэрдьигэстээххэ СӨ Ил Түмэнин бэрэссэдээтэлинэн, наукаларын академиятын президенинэн үлэлии сылдьыбыт Василий Васильевич Филиппов Сэмэн, Соппуруон Даниловтар ааттарынан Духуобунас киинигэр дьонун-сэргэтин кытта көрсүһэн, санаа атастаһан барда.
Василий Филиппов икки ыҥырыыга Горнай улууһуттан норуот депутата буолан талыллан, Саха сирин салайыыга үлэлэһэригэр кыах биэрбит быыбардааччыларга махтанна. Өрүү улууһун олохтоохторун кытта көрсүһүүлэрин, кинилэр кыһалҕаларын туоратыыга үлэлэспит кэмнэрин, олус күндүтүк саныырын иһитиннэрдэ. Сорох ардыгар маннык мунньахтарга уоттаахтык-төлөннөөхтүк тыл этэр аҕа табаарыстарбын, үүнэр-сайдар туһугар туруулаһар ыччаппын түүлбэр да көрөн ылар кэмнэрдээх этим диэн, долгуйан туран эттэ.
Бу 10 сыл устатыгар төрөөбүт дойдутугар сөптөөх үлэ көстүбэккэ, Москубаҕа олорбутун, Россия наукаларын академиятын өйөбүлүнэн, Аан дойдуга тиийэ биллэр бөдөҥ тэрилтэлэргэ таһаарыылаахтык үлэлээбитин кэпсээтэ. Кырдьыга, бу киин, сайдыылаах сиргэ да сырыттар, дойду барахсан ахтылҕана хаһан да намыраабатаҕын, өйүнэн-санаатынан, сүрэҕинэн-быарынан төрөөбүт өрөспүүбүлүкэтигэр тардыһарын ахтан ааста.
Сахатын сиригэр, оҕолоругар, сиэннэригэр көһөн кэлбитин эттэ. Саха дьоно хаһааҥҥытааҕар да сомоҕолоһон, биир өйгө-санааҕа кэлэн, аҥардас өрөспүүлүкэ таһымыгар эрэ буолбакка, улуус, нэһилиэк аайы сайдыы саҥа суолун тутуһан ситиһиилээхтик үлэлииргэ баҕа санаалааҕын эттэ.
