Кулун тутар 22 күнүгэр Саха сиригэр “Төрөппүттэр БКЭ-ни туттарар күннэрэ” Бүтүн Арассыыйатааҕы аахсыйа ыытыллар. Бу тэрээһин бэһис сылын үөрэҕирии, наука эйгэтин хонтуруоллуур федеральнай сулууспа көҕүлээһининэн ыытыллар.
Бу аахсыйа төрөппүттэр Биир кэлим эксээмэн хаамыытын кытары билсиһэллэригэр туһуланар. Төрөппүттэр эмиэ долгуйаллар, ньиэрбинэйдииллэр, ол үксүгэр кинилэр эксээмэн хайдах барарын билбэттэриттэн буолар. Төрөппүттэрин долгуйуута оҕоҕо бэриллэр. Онон эксээмэн хайдах барарын ис-иһиттэн билэн баран, оҕо үчүгэйдик, холкутук туттарарыгар бэлэмниэхтээхтэр.
Быйыл төрөппүттэр нуучча тылыгар эксээмэни туттаран, билиилэрин тургутуохтара. Бары оскуолаларга санитарнай ирдэбиллэр тутуһуллуохтара. Киирэр ааҥҥа металлодетекторга бэрэбиэркэттэн, регистрацияттан саҕалаан, түмүгү ылыахха диэри эксээмэн хаамыытын ааһан, көрүөхтэрэ-истиэхтэрэ. Аахсыйа кыттааччылара кылгатыллыбыт барыйаанынан эксээмэн сорудахтарын толоруохтара.
Бары улуустарга муус устар 30 күнүгэр диэри ыытыллыаҕа диэн үөрэх министиэристибэтэ иһитиннэрэр.
Источник: © edersaas.ru сайтан: https://edersaas.ru/t-r-pp-tter-ekseemeni-tuttaryahtara/
