Уус-Алдан киинигэр, Бороҕоҥҥо, нэһилиэктэр библиотекардара семинарга түмүстүлэр. Саха сирин туһунан Россияҕа киэҥник сырдаппыт ытык киһилэрэ, суруйааччы, бөдөҥ общественнай деятель Василий Никифоров-Күлүмнүүр төрөөбүтэ 150 сылынан, «Победа» колхуоһу тэрийбит Петр Данилов төрөөбүтэ 100 сылынан уонна Үлэ Геройа Михаил Готовцев 70 сааһынан, ону сэргэ өрөспүүбүлүкэҕэ, Россияҕа биллэриллибит бэлиэ сылларынан тэрийэр үлэлэрин-хамнастарын сүбэлэстилэр. Бу туһунан СИА Бороҕонтон киин библиотека дириэктэрэ Варвара Окоемова сэһэргээтэ.
«Бастатан туран, биһиги үлэбитигэр буспут-хаппыт үөрүйэхтээх библиотекардар эдэрдэргэ сүбэ-ама биэрэллэригэр, үөрэтэллэригэр-такайалларыгар, көмөлөһөллөрүгэр анаан киэҥ хабааннаах үлэ ыытыллара былааннанар. Күрэстэһиилэр, тэрээһиннэр, быыстапкалар тиһиктээхтик ыытыллыахтара», — диэн эттэ.
Варвара Николаевна В.Никифоров-Күлүмнүүр төрөөбүтэ 150 сылынан тэрийэр куонкурустарыгар библиотекардар кытталларын бэлиэтиир. Күрэстэһии балаҕан ыйыттан үс ый устата салҕаныахтаах. Тэрээһин чэрчитинэн бары нэһилиэктэргэ ыытыллар кыттыгас үлэлэр, күрэхтэһиилэр эдэрдэри үлэҕэ көҕүлүүрүгэр эрэнэллэр. Маны сэргэ, Россияҕа Киинэ сылынан, быыстапкалары уратытык оҥорор былааннаахтар.
Онуоха Бээрийэ библиотекатын коллектива нэһилиэк биллэр-көстөр дьонун туһунан киинэни устууга куонкурус тэрийэр. Бу күрэстэһиигэ оскуола үрдүкү кылааһын үөрэнээччилэрэ кыттарга сыал-сорук туруоруммуттар. Маныаха дьүүллүүр сүбэҕэ нэһилиэктэн үүнэн-сайдан тахсыбыт ытык дьоннорун киллэрбиттэрэ күрэстэһии сытыытык барарын билгэлиир. Библиотека үлэһиттэрэ тыа сирдэрин тупсарыы хайысхатыгар, нэһилиэнньэни кинигэнэн хааччыйыыга, ааҕааччылар болҕомтолорун тардыыга эмиэ сонун хайысхалары киллэрэр соруктаахтар. Быйыл Кыайыы күнүгэр, бары нэһилиэктэргэ былырыыҥҥыларын курдук, уопсай ааҕыы күнүн тэрийиэхтээхтэр.
Семинарга улуус социальнай управлениетын испэсэлииһэ Анна Бурнашова кыттыгас үлэни хайдах сайыннарарга санаатын үллэһиннэ. Маныаха инбэлииттэргэ, кэлэллэрэ-бараллара хааччахтаах дьоҥҥо кинигэни уларсыы, иһитиннэриилэри кэмигэр тиэрдии ситимин тупсарыыга сүбэ-саргы тыллар этилиннилэр.
This post was published on 26.02.2016 14:18 14:18